AUS vs IND: భారత్‌తో వన్డే, టీ20 సిరీస్ నుంచి తప్పుకున్న ఆస్ట్రేలియా ఫాస్ట్ బౌలర్

భారత్‌తో జరగనున్న పరిమిత ఓవర్ల సిరీస్‌ నుంచి ఆస్ట్రేలియా ఫాస్ట్ బౌలర్ కేన్ రిచర్డ్‌సన్ తప్పుకున్నాడు. ఇటీవలే కేన్ భార్య నైకీ మగ బిడ్డకు జన్మనిచ్చింది. భార్య, కొడుకుతో గడపటం కోసం రిచర్డ్‌సన్ వన్డే, టీ20 సిరీస్‌ల నుంచి వైదొలిగాడు. ఈ విషయాన్ని క్రికెట్ ఆస్ట్రేలియా కూడా నిర్ధారించింది. రిచర్డ్‌సన్ స్థానాన్ని ఆండ్రూ టై భర్తీ చేయనున్నాడు.

భారత్, ఆస్ట్రేలియా మధ్య తొలి వన్డే నవంబర్ 27న జరగనుంది. 2013లో అంతర్జాతీయ క్రికెట్‌లోకి అడుగుపెట్టిన రిచ్డర్‌సన్.. ఆస్ట్రేలియా తరఫున 25 వన్డేల్లో 39 వికెట్లు తీశాడు. 21 అంతర్జాతీయ టీ20లు ఆడి 22 వికెట్లు పడగట్టాడు.

రిచర్డ్‌సన్ రీప్లేస్‌మెంట్‌గా ఎంపికైన ఆండ్రూ టై 7 వన్డేలు, 26 టీ20లు ఆడాడు. ఇటీవల ఇంగ్లాండ్‌లో పర్యటించిన ఆస్ట్రేలియా జట్టలో బ్యాకప్ పేసర్‌గా వ్యవహరించాడు. ‘‘కేన్‌ సేవలను మేం మిస్సవుతాం. కానీ తీవ్రమైన ఛాలెజింగ్ పరిస్థితుల్లోనూ మా ఆటగాళ్లకు, వారి కుటుంబాలకు మేం మద్దుగా ఉంటాం. రిచర్డ్‌సన్ నిర్ణయానికి మద్దతుగా నిలిచాం’’ అని ఆస్ట్రేలియా సెలక్టర్ ట్రేవర్ హోన్స్ తెలిపాడు.

జనవరిలో అనుష్క శర్మ బిడ్డకు జన్మనున్న నేపథ్యంలో.. ఆస్ట్రేలియాతో తొలి టెస్టు ముగిశాక విరాట్ కోహ్లి భారత్ తిరిగి రానున్న సంగతి తెలిసిందే.