ఉసూరుమనిపించిన భారత బ్యాట్స్‌మన్.. ఆసీస్ లక్ష్యం 127

విశాఖపట్నం వేదికగా జరుగుతోన్న తొలి టీ20లో ఆస్ట్రేలియాకు భారత్ 127 పరుగుల లక్ష్యాన్ని నిర్దేశించింది. నిర్ణీత 20 ఓవర్లలో భారత్ 7 వికెట్ల నష్టానికి 126 పరుగులు చేసింది. టాస్ ఓడి బ్యాటింగ్‌కు దిగిన భారత్‌కు ఆదిలోనే పెద్ద దెబ్బ తగిలింది. తొలి బంతి నుంచి ఇబ్బంది పడుతూ ఆడిన రోహిత్ శర్మ బెహ్రెండార్ఫ్ వేసిన ఇన్నింగ్స్ మూడో ఓవర్‌లో ఔటయ్యాడు. షార్ట్ ఫైన్‌లో జంపాకు క్యాచ్ ఇచ్చి వెనుదిరిగాడు. దీంతో 14 పరుగులకే భారత్ తొలి వికెట్‌ను కోల్పోయింది. రోహిత్ ఔటైనా మరో ఓపెనర్ కేఎల్ రాహుల్ (50) దూకుడుగా ఆడాడు. కెప్టెన్ విరాట్ కోహ్లీ (24)తో కలిసి స్కోరు బోర్డును పరుగులు పెట్టించాడు. వీరిద్దరూ కలిసి రెండో వికెట్‌కు 55 పరుగుల విలువైన భాగస్వామ్యాన్ని నెలకొల్పారు.

అయితే దూకుడుగా ఆడుతున్న సమయంలో విరాట్ కోహ్లీని స్పిన్నర్ జంపా బోల్తా కొట్టించాడు. జంపా వేసిన 9వ ఓవర్‌లో భారీ షాట్‌కు ప్రయత్నించిన కోహ్లీ కౌల్టర్‌నైల్‌కు క్యాచ్ ఇచ్చి ఔటయ్యాడు. 69 పరుగుల వద్ద కోహ్లీ వికెట్‌ను కోల్పోయిన టీమిండియా అక్కడి నుంచి వరసపెట్టి వికెట్లను పారేసుకుంది. అనవసరపు పరుగు కోసం ప్రయత్నించి రిషబ్ పంత్ (3) రనౌట్ అయ్యాడు. ఆ తరవాత క్రీజులోకి వచ్చిన ధోనీ ఆచి తూచి ఆడాడు. ఈ క్రమంలో కేఎల్ రాహుల్ హాఫ్ సెంచరీ పూర్తి చేశాడు. వీరిద్దరూ నిలదొక్కుకుంటారు అని అనుకుంటే కౌల్టర్‌నైల్ షాకిచ్చాడు.

ఒకే ఓవర్‌లో కేఎల్ రాహుల్, దినేశ్ కార్తిక్‌ను పెవిలియన్‌కు పంపాడు. భారీ షాట్ కోసం ప్రయత్నించిన రాహుల్.. మిడ్ ఆఫ్‌లో ఉన్న ఫించ్‌కు దొరికిపోయాడు. ఇదే ఓవర్‌లో దినేశ్ కార్తిక్ (1) క్లీన్ బౌల్డ్ అయ్యాడు. క్రునాల్ పాండ్య (1), ఉమేశ్ యాదవ్ (2) ఇలా వచ్చి అలా వెళ్లారు. ఆఖరి ఓవర్లలో ఆస్ట్రేలియా బౌలర్లు అద్భుతంగా బౌలింగ్ చేశారు. ధోనీ (29 నాటౌట్) చివరి వరకూ ఉన్న అతనికి ఏ మాత్రం అవకాశం ఇవ్వలేదు. అయితే కౌల్టర్‌నైల్ వేసిన ఇన్నింగ్స్ ఆఖరి ఓవర్‌లో ధోనీ ఒక సిక్స్ బాది నాటౌట్‌గా నిలిచాడు. ఆస్ట్రేలియా బౌలర్లలో కౌల్టర్‌నైల్ అత్యధికంగా 3 వికెట్లు పడగొట్టాడు. బెహ్రెండార్ఫ్, జంపా, కమ్మిన్స్ ఒక్కో వికెట్ తీశారు.