IND vs AUS: స్టీవ్‌స్మిత్ స్టంపౌట్ మిస్.. కీపర్ రాహుల్ బంతి వదిలేసి..?

ఆస్ట్రేలియాతో మంగళవారం జరుగుతున్న మూడో టీ20 మ్యాచ్‌లో టీమిండియా వికెట్ కీపర్ కేఎల్ రాహుల్ సులువైన స్టంపింగ్ అవకాశాన్ని చేజార్చాడు. ఇన్నింగ్స్ 10వ ఓవర్ వేసిన వాషింగ్టన్ సుందర్ బౌలింగ్‌లో క్రీజు వెలుపలికి వెళ్లి బంతిని హిట్ చేసేందుకు ఆస్ట్రేలియా మాజీ కెప్టెన్ స్టీవ్‌స్మిత్ (24: 23 బంతుల్లో 1x4) ప్రయత్నించాడు. అయితే.. సుందర్ తెలివిగా బంతిని లెగ్‌ వికెట్‌కి కాస్త దూరంగా వెళ్లేలా టర్న్ చేశాడు. దాంతో.. స్టీవ్‌స్మిత్ బ్యాట్‌కి బంతి దొరకలేదు.


స్టీవ్‌స్మిత్ బ్యాట్ పక్క నుంచి వెనక్కి వచ్చిన బంతిని ఒడిసిపట్టుకోవడంలో కేఎల్ రాహుల్ విఫలమయ్యాడు. అతని చేతి నుంచి బౌన్స్ అయిన బంతి క్రీజు పక్కన పడిపోయింది. దాంతో.. మళ్లీ ఆ బంతిని అందుకుని స్టంపౌట్ చేసేందుకు రాహుల్ డైవ్ చేసి మరీ వికెట్ల వైపు బాల్‌ని విసిరాడు. కానీ.. అతని గురి తప్పింది. దాంతో.. స్టీవ్‌స్మిత్‌కి జీవనదానం లభించింది.

స్టంపౌట్ మిస్ అయిన తర్వాత బంతికి ఫోర్ బాదిన స్టీవ్‌స్మిత్.. అదే ఓవర్‌లో నాలుగో బంతికి క్లీన్ బౌల్డయ్యాడు. ఆఫ్ స్టంప్‌కి వెలుపలగా ఈసారి బంతి విసిరిన సుందర్ నేరుగా వికెట్లపైకి టర్న్ చేశాడు. దాంతో.. బ్యాట్‌కి దొరకని బంతి నేరుగా వెళ్లి వికెట్‌ని గీరాటేసింది.