విజేత నిర్ణయాత్మక వన్డేలో ఆసీస్ ఓటమి

ఆస్ట్రేలియా జట్టుకి సొంతగడ్డపై ఊహించని పరాభవం ఎదురైంది. దక్షిణాఫ్రికాతో ఈరోజు జరిగిన సిరీస్ విజేత నిర్ణయాత్మక మూడో వన్డేలో ఆ జట్టు 40 పరుగుల తేడాతో చిత్తుగా ఓడి సిరీస్‌ని 1-2తో చేజార్చుకుంది. తొలి వన్డేలో 6 వికెట్ల తేడాతో ఓడిన కంగారూలు.. రెండో వన్డేలో ఆఖరి బంతి వరకూ పోరాడి 7 పరుగుల తేడాతో గెలుపొందారు. దీంతో.. మూడో వన్డేపై సర్వత్రా ఆసక్తి నెలకొనగా.. బౌలింగ్, బ్యాటింగ్‌లోనూ విఫలమైన ఆసీస్ ఘోర పరాజయాన్ని మూటగట్టుకుంది. ఈ రెండు జట్ల మధ్య శనివారం ఏకైక టీ20 మ్యాచ్ జరగనుంది.

హోబర్ట్ వేదికగా జరిగిన మూడో వన్డేలో టాస్ గెలిచిన ఆస్ట్రేలియా జట్టు సఫారీలను బ్యాటింగ్‌కు ఆహ్వానించింది. ఓపెనర్లు డికాక్ (4), హెండ్రిక్స్ (8) ఫెయిలైనా.. కెప్టెన్ డుప్లెసిస్ (125: 114 బంతుల్లో 15x4, 2x6), డేవిడ్ మిల్లర్ (139: 108 బంతుల్లో 13x4, 4x6) శతకాలు బాదడంతో దక్షిణాఫ్రికా జట్టు నిర్ణీత 50 ఓవర్లలో 5 వికెట్ల నష్టానికి 320 పరుగులు చేసింది. ఆసీస్ బౌలర్లలో మిచెల్ స్టార్క్, స్టాయినిస్ చెరో రెండు వికెట్ల పడగొట్టారు.

భారీ లక్ష్యఛేదనలో ఆస్ట్రేలియా జట్టు తడబడింది. ఓపెనర్లు క్రిస్‌లిన్ (0) తొలి బంతికే డకౌటవగా.. అరోన్ ఫించ్ (11) చేతులెత్తేశాడు. ఆ తర్వాత వచ్చిన ట్రావిస్ హెడ్‌ (6) కూడా అదే బాటలో పెవిలియన్ చేరిపోయాడు. దీంతో.. 39/3తో కష్టాల్లో పడిన ఆ జట్టుని షాన్ మార్ష్ (106: 102 బంతుల్లో 7x4, 4x6), స్టాయినిస్ (63: 76 బంతుల్లో 5x4, 4x6) ఆదుకున్నారు. నాలుగో వికెట్‌కి 107 పరుగుల భాగస్వామ్యం నెలకొల్పిన ఈ జోడీ.. జట్టు స్కోరు 146 వద్ద విడిపోగా.. ఆ తర్వాత ఒత్తిడిలో పడిన ఆసీస్ ఆఖరికి 280/9కే పరిమితమైంది. హిట్టర్ మాక్స్‌వెల్ (35: 27 బంతుల్లో 3x4)‌ని ఏడో స్థానంలో ఆడించాలనే ఆలోచన ఆ జట్టుని దెబ్బతీసినట్లు తెలుస్తోంది. దీనికి తోడు.. క్రిస్‌లిన్‌ని రెండో వన్డేలో నాలుగో స్థానంలో ఆడించిన ఆసీస్.. ఈ వన్డేకి ఓపెనర్‌గా దింపి ఫెయిలైంది. అలానే ట్రావిస్ హెడ్‌ని ఓపెనింగ్ నుంచి మిడిలార్డర్‌కి మార్చింది. ఇలా బ్యాటింగ్ ఆర్డర్‌లో ఊహించని మార్పులు.. ఆసీస్ టాప్ ఆర్డర్‌ని ఒత్తిడిలోకి నెట్టింది.