బాల్య వివాహ బాధితురాలు.. క్రికెట్‌లో హిట్

బాల్య వివాహం నుంచి బయటపడిన హైదరాబాద్‌ యువతి అనూష అండర్-19 క్రికెట్ జట్టు తరఫున జాతీయ స్థాయిలో విశేషంగా రాణిస్తోంది. గత ఏడాది అనూషకి తల్లిదండ్రులు, బంధువులు బలవంతంగా బాల్య వివాహం చేసేందుకు ప్రయత్నించారు. అయితే.. సమాచారం అందుకున్న రాచకొండ పోలీసులు ఆ వివాహాన్ని నిలిపి వేయించి క్రీడల్లో ఎక్కువ ఆసక్తి కనబరుస్తున్న అనూషని ప్రోత్సహించారు. ఇటీవల ముగిసిన అండర్-19 జాతీయ స్థాయి క్రికెట్ మ్యాచ్‌ల్లో అనూష ఆల్‌ రౌండర్‌ ప్రదర్శనతో ఆకట్టుకుంది. దీంతో.. రాచకొండ పోలీస్ కమీషనర్ మహేశ్ ఎం. భగత్ ఈ మహిళా క్రికెటర్‌ని ఘనంగా సత్కరించారు.

‘అనూష సంరక్షణ బాధ్యత ఇకపై పోలీసు శాఖ చూసుకుంటుంది. అంతేకాదు.. ఆమెకి అవసరమైన ఆర్థిక తోడ్పాటు, కెరీర్‌లో ఎదిగేందుకు అన్ని సదుపాయాల్ని కూడా మేము కల్పిస్తాం’ అని కమీషనర్ వివరించారు. అనూష బాల్య వివాహ సమాచారాన్ని అప్పట్లో పోలీసులకి అందించిన బాలల హక్కుల సంఘం అధ్యక్షుడు అచ్యుత రావు చేతుల మీదుగా ఓ అవార్డుని కూడా తల్లిదండ్రుల సమక్షంలో ఈ క్రికెటర్ ఆ కార్యక్రమంలో అందుకుంది. అనూష త్వరలోనే అండర్-19 రగ్బీ టోర్నమెంట్‌‌లో కూడా ఆడనుంది. ఆమె‌కి క్రికెట్‌తో పాటు.. రగ్బీలోనూ ప్రావీణ్యం ఉందని పోలీసులు వెల్లడించారు.