ఆ సంచలన బౌలర్ భారత్‌కు రావడం లేదు!

టీం ఇండియా ఆటగాళ్లను రెండేళ్ల క్రితం ముప్పుతిప్పలు పెట్టిన బంగ్లాదేశ్ సంచలన పేస్ బౌలర్ ముస్తాఫిజుర్ రెహ్మాన్ భారత పర్యటనకు దూరమయ్యాడు. సొంత గడ్డపై భారత్‌పై చెలరేగిపోయిన ఈ యువ బౌలర్ ఆ తరవాత విదేశాల్లోనూ మంచి ప్రదర్శనలు చేసాడు. ప్రపంచంలోని అన్ని ఉత్తమ జట్లపై అద్భుతమైన ప్రదర్శన కనబరిచిన ముస్తాఫిజుర్ అనతికాలంలోనే మంచి బౌలర్‌గా గుర్తింపు తెచ్చుకున్నాడు. కిందటి సంవత్సరం ఐపీఎల్‌లోనూ ఆకట్టుకున్న ఈ బౌలర్‌పై ఆస్ట్రేలియా బిగ్ బాష్ టోర్నీ కూడా ఆసక్తి కనబరుస్తోంది.

అయితే ఈ నెల 9 నుంచి భారత్‌తో జరగబోయే ఏకైక టెస్టు మ్యాచ్‌కు ముస్తాఫిజుర్ దూరమయ్యాడు. గాయానికి శస్త్రచికిత్స చేయించుకున్న ముస్తాఫిజుర్ కోలుకున్నప్పటికీ సరైన ప్రాక్టీస్ లేకపోవడంతో అతన్ని ఈ మ్యాచ్‌కు ఎంపిక చేయలేదు. ముస్తాఫిజుర్ స్థానంలో మరో పేసర్ షఫియుల్ ఇస్లాంను తీసుకున్నారు. ఈ మేరకు ముష్ఫికర్ రహీం సారథ్యంలోని 15 మంది సభ్యలు జట్టును బంగ్లాదేశ్ క్రికెట్ బోర్డు ప్రకటించింది. భారత్, బంగ్లాదేశ్ మధ్య జరగనున్న ఈ ఏకైక టెస్టు మ్యాచ్‌కు హైదరాబాద్‌లోని ఉప్పల్ స్టేడియం ఆతిథ్యమిస్తోంది. ఐపీఎల్‌లో సన్‌రైజర్స్ తరఫున ఆడిన ముస్తాఫిజుర్ ఈ టెస్టు మ్యాచ్‌కు అందుబాటులో లేకపోవడంతో కచ్చితంగా బంగ్లాకు పెద్ద లోటే.

బంగ్లా జట్టు: ముష్ఫికర్‌ రహీమ్‌ (కెప్టెన్‌), తమీమ్‌ ఇక్బాల్‌, సౌమ్య సర్కార్‌, మహ్మదుల్లా రియాద్, ఇమ్రుల్‌ కయీస్, షకీబ్‌ అల్‌హసన్‌, మెహదీ హసన్‌ మిరాజ్, మొమినుల్‌ హక్‌, షబ్బీర్‌ రెహ్మాన్‌, లిటన్‌ దాస్‌, తస్కిన్‌ అహ్మద్‌, సుబాశిష్‌ రాయ్‌, తైజుల్‌ ఇస్లాం, కమ్రుల్ ఇస్లాం రబ్బి, షఫియుల్‌ ఇస్లాం