బంగ్లాదేశ్‌కి ఆఖరి వన్డేలోనూ జింబాబ్వే ఝలక్.. టార్గెట్ 257

జింబాబ్వే గడ్డపై బంగ్లాదేశ్‌కి మూడో వన్డేలో గట్టి షాక్ తగిలే సూచనలు కనిపిస్తున్నాయి. ఇప్పటికే జింబాబ్వే చేతిలో వరుసగా రెండు వన్డేల్లోనూ చిత్తుగా ఓడిపోయిన బంగ్లాదేశ్.. ఈరోజు జరుగుతున్న మూడో వన్డేలోనూ ఫస్ట్ బ్యాటింగ్ చేసి నిర్ణీత 50 ఓవర్లలో 9 వికెట్ల నష్టానికి 256 పరుగులు మాత్రమే చేయగలిగింది. ఫస్ట్ వన్డేలో బంగ్లాదేశ్ నిర్దేశించిన 304 పరుగుల లక్ష్యాన్ని 10 బంతులు మిగిలి ఉండగానే ఛేదించేసిన జింబాబ్వే.. రెండో వన్డేలోనూ బంగ్లాదేశ్ నిర్దేశించిన 291 పరుగుల లక్ష్యాన్ని 15 బంతులు మిగిలి ఉండగానే ఛేదించేసిన విషయం తెలిసిందే. ఇటీవల ముగిసిన మూడు టీ20ల సిరీస్‌లోనూ బంగ్లాదేశ్‌ని 2-1తో జింబాబ్వే ఓడించేసింది. జింబాబ్వే క్రికెట్ చరిత్రలో ఈ తరహాలో బంగ్లాపై ఆ జట్టు ఇప్పటి వరకూ ఆధిపత్యం చెలాయించలేదు.

ఈరోజు మ్యాచ్‌లో టాస్ ఓడి మొదట బ్యాటింగ్ చేసిన బంగ్లాదేశ్ ఆరంభంలోనే తడబడింది. ఆ జట్టులో కెప్టెన్ తమీమ్ ఇక్బాల్ (19), షాంటో (0), ముష్ఫికర్ రహీమ్ (0) వరుసగా తక్కువ స్కోరుకే ఔటైపోయారు. కానీ.. మరో ఓపెనర్ అనముల్ (76: 71 బంతుల్లో 6x4, 1x6), ఆఫిప్ హొసెన్ (85 నాటౌట్: 81 బంతుల్లో 6x4, 2x6) హాఫ్ సెంచరీలు నమోదు చేసి బంగ్లాదేశ్‌ని ఆదుకున్నారు. కానీ.. చివర్లో మళ్లీ బంగ్లాదేశ్ తడబడగా.. వరుసగా హసన్ (0), ముస్తాఫిజుర్ (0), తైజుల్ ఇస్లామ్ (5) ఇలా వచ్చి అలా వెళ్లిపోయారు. దాంతో.. బంగ్లాదేశ్ 256/9కే పరిమితమైంది. బంగ్లా టీమ్‌లో ముగ్గురు బ్యాటర్లు రనౌట్‌గా వెనుదిరగడం గమనార్హం.