ఓడిపోతే.. కెప్టెన్సీని వదులుకోవాలా..?

దక్షిణాఫ్రికాతో టెస్టు సిరీస్‌ ఓడిపోయినంత మాత్రానా.. తాను కెప్టెన్సీ నుంచి వైదొలగాల్సిన అవసరం లేదని బంగ్లాదేశ్ కెప్టెన్ ముష్ఫికర్ రహీమ్ ఘాటు వ్యాఖ్యలు చేశాడు. ఆదివారం ముగిసిన రెండు టెస్టుల సిరీస్‌లో పేలవ ప్రదర్శన‌ని కొనసాగించిన బంగ్లాదేశ్ తొలి టెస్టులో 333 పరుగులు, రెండో టెస్టులో 254 పరుగుల భారీ తేడాతో సఫారీల చేతిలో ఘోర పరాజయం చవిచూసింది. బ్యాటింగ్‌కి సహకరించే పిచ్‌పై టాస్ గెలిచి.. రెండు టెస్టుల్లోనూ బంగ్లాదేశ్ కెప్టెన్ ముష్ఫికర్ రహీమ్ ఫీల్డింగ్ ఎంచుకోవడంపై సర్వత్రా విమర్శలు చెలరేగుతున్నాయి. వీటిపై తాజాగా అతను స్పందించాడు.

‘జట్టు మెరుగైన ప్రదర్శన చేస్తే అందరూ టీమ్ మేనేజ్‌మెంట్‌ని ప్రశంసిస్తారు. అదే పరాజయాలు చవిచూసినప్పుడు మాత్రం కెప్టెన్‌ని విమర్శిస్తారు. ఇప్పుడు కూడా ఆ విమర్శల్ని నేను స్వీకరిస్తాను. ఇక కెప్టెన్సీ నుంచి వైదొలగడం అంటారా..? బంగ్లాదేశ్ క్రికెట్ బోర్డు దానిపై తుది నిర్ణయం తీసుకుంటుంది. కెప్టెన్‌గా నేను ఉండాలా లేదా దిగిపోవాలా అనే నిర్ణయం మాత్రం నేను వ్యక్తిగతంగా తీసుకోను. మరో టెస్టు సిరీస్‌కి ఇంకా చాలా సమయం ఉన్నందున ఈ లోపు జట్టుకి ఉపయోగపడే నిర్ణయం బోర్డే తీసుకుంటుంది’ అని ముష్ఫికర్ వివరించాడు.