శ్రీలంకపై భారీ స్కోరు బాదిన బంగ్లాదేశ్

సొంతగడ్డపై టెస్టుల్లో బంగ్లాదేశ్ మళ్లీ మెరిసింది. ఏడాది క్రితం ఇంగ్లాండ్ జట్టుని ముప్పుతిప్పలు పెట్టిన ఈ పసికూన తాజాగా శ్రీలంకతో జరుగుతున్న టెస్టు సిరీస్‌ని భారీ స్కోరుతో ఆరంభించింది. చిట్టిగాంగ్ వేదికగా బుధవారం ఆరంభమైన తొలి టెస్టులో మామినల్ హక్ (175 బ్యాటింగ్: 203 బంతుల్లో 16x4, 1x6) అజేయ శతకం బాదడంతో తొలి రోజు ఆట ముగిసే సమయానికి బంగ్లాదేశ్ 374/4తో నిలిచింది. హక్‌తో పాటు ముష్ఫికర్ రహీమ్ (92: 192 బంతుల్లో 10x4) కీలక ఇన్నింగ్స్ ఆడాడు.

టాస్ గెలిచిన బంగ్లాదేశ్ కెప్టెన్ మహ్మదుల్లా బ్యాటింగ్ ఎంచుకున్నాడు. ఓపెనర్లు తమీమ్ ఇక్బాల్ (52: 53 బంతుల్లో 6x4, 1x6), ఇమ్రూల్ కైస్ (40: 75 బంతుల్లో 4x4) తొలి వికెట్‌కి 72 పరుగుల భాగస్వామ్యంతో శుభారంభమిచ్చారు. అర్ధశతకం అనంతరం ఇక్బాల్ ఔటవగా.. క్రీజులోకి వచ్చిన హక్ శ్రీలంక బౌలర్లని సహనంతో ఎదుర్కొన్నాడు. క్రీజులో కుదురుకునే వరకూ ఎలాంటి సాహసాలకి వెళ్లకుండా ఆచితూచి ఆడిన ఈ యువ క్రికెటర్.. తర్వాత వరుస బౌండరీలతో రెచ్చిపోయాడు. జట్టు స్కోరు 120 వద్ద ఇమ్రూల్ ఔటవడంతో క్రీజులోకి వచ్చిన ముష్ఫికర్ రహీమ్ కూడా బ్యాట్ ఝళిపించడంతో లంక బౌలర్ల కష్టాలు రెట్టింపయ్యాయి.

బౌలర్ల సహనాన్ని పరీక్షిస్తూ.. మూడో వికెట్‌కి హక్-రహీమ్ జోడి అభేద్యంగా 236 పరుగుల భాగస్వామ్యం నెలకొల్పారు. ఈ దశలోనే శతకానికి చేరువైన రహీమ్ బంతిని హిట్ చేసే ప్రయత్నంలో ఔటవగా.. లిటన్ దాస్ (0) గోల్డన్ డక్‌గా ఔటయ్యాడు. అయితే.. తర్వాత వచ్చిన కెప్టెన్ మహ్మదుల్లా (9 బ్యాటింగ్)తో కలిసి మరో వికెట్‌ పడకుండా హక్ తొలి రోజు ఆటని ముగించాడు. శ్రీలంక బౌలర్లలో లక్మల్ రెండు వికెట్లు పడగొట్టగా.. పెరీరా, సండకన్ చెరో వికెట్ తీశారు.