బెన్‌స్టోక్స్ చాలా పెద్ద తప్పు చేశాడు..!

ఇంగ్లాండ్ స్టార్ ఆల్‌రౌండర్ బెన్‌స్టోక్స్ మద్యం మత్తులో ఒక వ్యక్తిని తీవ్రంగా గాయపరిచి చాలా పెద్ద తప్పు చేశాడని ఆ దేశ మాజీ కెప్టెన్ మైకెల్ వాన్ అభిప్రాయపడ్డాడు. వెస్టిండీస్‌తో మ్యాచ్‌కి 72 గంటల ముందు క్రికెటర్‌ అలా పార్టీకి వెళ్లడం, మద్యం సేవించడం అతని క్రమశిక్షణరాహిత్యానికి అద్దంపడుతోందని వాన్ వివరించాడు. భారత్, ఆస్ట్రేలియా, బంగ్లాదేశ్‌ లాంటి దేశాల్లో ఇలా క్రికెటర్లని వెలుపలికి అనుమతించరని.. ఇంగ్లాండ్‌లో మాత్రమే ఈ నిర్లక్ష్య ధోరణి ఉందని ఆవేదన వ్యక్తం చేశాడు. బెన్‌స్టోక్స్‌ ఒక వ్యక్తి ముఖంపై పిడిగుద్దులు కురిపిస్తున్న వీడియో ఒకటి బహిర్గతం కావడంతో అతడ్ని.. ఇంగ్లాండ్ జట్టు నుంచి తాత్కాలికంగా బోర్డు తప్పించిన విషయం తెలిసిందే. అతనికి కనీసం ఐదేళ్లు జైలు శిక్ష పడే అవకాశం ఉన్నట్లు వార్తలు వస్తున్నాయి.

‘బెన్‌స్టోక్స్ వయసు 26 ఏళ్లు. అతను కొంచెమైనా పరిణతితో ఆలోచించాలి. మ్యాచ్‌కి ముందు అలా మద్యం సేవించి ఒక వ్యక్తిని గాయపరిచి చాలా పెద్ద తప్పు చేశాడు. అందుకే అతనిపై ప్రస్తుతం నాకు ఎలాంటి జాలి లేదు. ఇంగ్లాండ్ జట్టు మేనేజ్‌మెంట్ ఆటగాళ్ల క్రమశిక్షణపై దృష్టి పెట్టాలి. అలా అని హెడ్‌మాస్టర్‌గా పర్యవేక్షించాల్సిన పనిలేదు. క్రికెటర్లు సరదాగా ఉన్నా.. దానికంటూ సమయం, సందర్భం ఉండాలి. అలా ఉండకపోతే గత వారంలో ఏం జరిగిందో అందరం చూశాం. ఒకవేళ ఇంగ్లాండ్ జట్టు పర్యటన నిమిత్తం భారత్, ఆస్ట్రేలియా, బంగ్లాదేశ్‌ లాంటి దేశాలకి వెళితే.. వారు క్రికెటర్లని భద్రత లేకుండా అసలు వెలుపలికి అనుమతించరు. కానీ.. ఇక్కడ ఇంగ్లాండ్ క్రికెటర్లు స్వేచ్ఛగా బయట పార్టీలకి వెళ్తారు. మ్యాచ్‌ల సమయంలో భారత్‌‌ లాంటి దేశాల్లో రాత్రివేళ క్రికెటర్లని అసలు వెలుపలికి అనుమతించరు’ అని వాన్ వివరించాడు.