AUS vs IND: టెస్టు సిరీస్ నుంచి ఇషాంత్ ఔట్.. సన్‌రైజర్స్ పేసర్‌కు జాక్‌పాట్

ఆస్ట్రేలియా పర్యటనలో ఉన్న భారత జట్టుకు భారీ షాక్ తగిలింది. ఫాస్ట్ బౌలర్ ఇషాంత్ శర్మ టెస్టు సిరీస్ నుంచి పూర్తిగా వైదొలిగాడు. ఈ విషయాన్ని బీసీసీఐ గురువారం రాత్రి అధికారికంగా ప్రకటించింది. ఐపీఎల్ ఆడుతున్న సమయంలో గాయపడిన ఇషాంత్.. ప్రస్తుతం బెంగళూరులోని ఎన్‌సీఏలో ఫిట్‌నెస్ ట్రైనింగ్ పొందుతున్న సంగతి తెలిసిందే. ఇషాంత్ సైడ్ స్ట్రెయిన్ ఇంజ్యూరీ నుంచి పూర్తిగా కోలుకున్నాడని తెలిపిన బీసీసీఐ.. కానీ టెస్టు మ్యాచ్ ఫిట్‌నెస్ సాధించలేదని వెల్లడించింది. దీంతో బోర్డర్ గావస్కర్ ట్రోఫీకి దూరమయ్యాడని తెలిపింది.

సన్‌రైజర్స్ పేసర్ టి నటరాజన్‌ను వన్డే జట్టులోకి తీసుకుంటున్నట్లు బీసీసీఐ ప్రకటించింది. వెన్ను సంబంధిత సమస్యలతో బాధపడుతున్న నవదీప్ సైనీకి బ్యాకప్ ఆప్షన్‌గా నటరాజన్‌ను జట్టులోకి తీసుకుంటున్నట్లు తెలిపింది. కోల్‌కతా నైట్ రైడర్స్ స్పిన్నర్ వరుణ్ చక్రవర్తి గాయపడటంతో.. నటరాజన్‌ను బీసీసీఐ టీ20 జట్టులోకి తీసుకున్న సంగతి తెలిసిందే.

ప్రస్తుతం ఎన్‌‌సీఏలో ఫిట్‌నెస్ ట్రైనింగ్‌లో ఉన్న రోహిత్ శర్మ.. టెస్టు సిరీస్‌లో ఆడేది లేనిది డిసెంబర్ 11న తేలనుంది. ఆ రోజున రోహిత్ ఫిట్‌నెస్‌ను పరీక్షించనున్నారు.