4 బంతులేసి 92 పరుగులిచ్చిన బంగ్లా బౌలర్

బౌలర్ ఒక ఓవర్లో అత్యధికంగా ఎన్ని పరుగులు ఇవ్వగలడు అని ప్రశ్నిస్తే.. ఎవరైనా 36 పరుగులని బదులిస్తారు. ఈ విషయంలో మనకు ఏ మాత్రం అనుమానాలున్నా.. స్టువర్ట్ బ్రాడ్‌కు మాత్రం బాగా తెలుసు. వరల్డ్ కప్‌లో ఇతగాడి బౌలింగ్‌లో యువీ ఆరు బంతుల్లో ఆరు సిక్సర్లు బాది 36 పరుగులు పిండుకున్నాడు. కానీ ఓ బంగ్లా బౌలర్ మాత్రం నాలుగు బంతులేసి ఏకంగా 92 రన్స్ ఇచ్చేశాడు. నమ్మశక్యంగా లేకున్నా ఇది నిజమే.. బ్యాట్స్‌మెన్ సిక్సర్లు బాదితేనో, బౌండరీలు కొడితేనో ఈ పరుగులు రాలేదు. మరి ఎలాగంటారా?

నాలుగు బంతులేయడానికి బంగ్లా బౌలర్ 13 వైడ్లు విసరగా.. అవన్నీ బౌండరీ లైన్‌ను తాకడంతో 65 పరుగులొచ్చాయి. వైడ్లు వేసినోడికి నోబాల్స్ ఒక లెక్కా.. అలవోకగా 15 నోబాల్స్ వేసేశాడు. ఇక కుదురుగా నాలుగు బంతులు విసిరితే బ్యాట్స్‌మెన్ 12 పరుగులు రాబట్టారు. మంగళవారం ఢాకా సెంకడరీ డివిజన్ క్రికెట్ లీగ్‌లో ఆక్సియమ్, లల్మాటియా జట్ల మధ్య మ్యాచ్‌లో సుజాన్ మహ్మద్ అనే బౌలర్ ఈ ఘనత సాధించాడు. ఢాకాలోని సిటీ క్లబ్ క్రికెట్ గ్రౌండ్ ఇందుకు వేదికైంది.


ఇంతకూ సదరు బౌలర్ గారు నాలుగు బంతులే ఎందుకు విసిరారో తెలుసా? 50 ఓవర్ల మ్యాచ్‌లో ముందుగా బ్యాటింగ్ చేసిన లల్మాటియా జట్టు 14 ఓవర్లలో 88 పరుగులు ఆలౌట్ అయ్యింది. తర్వాత ఆక్సియమ్ జట్టు బ్యాటింగ్‌కు దిగగా సుజాన్ తొలి ఓవర్ వేశాడు. నాలుగు బంతులు వేసే సరికి ప్రత్యర్థి జట్టు విజయం సాధించింది.

ఇలా ఎందుకైందయ్యా అని ప్రశ్నిస్తే.. ‘అంపైర్ల కారణంగా మా వాళ్లకు కోపమొచ్చింది. టాస్ ఎవరో గెలిచారో కూడా మా కెప్టెన్‌ను అంపైర్లు చూడనివ్వలేదు. తప్పుడు నిర్ణయాలు తీసుకున్నారు. దీంతో కోపమొచ్చి 4 బంతుల్లోనే మ్యాచ్‌ను ముగించేశాం’ అని ఆ క్లబ్ జనరల్ సెక్రటరీ అదనన్ రహ్మాన్ తెలిపాడు.