సిమెంట్‌ పిచ్‌పైనే బంతిని టర్న్ చేశా

కెరీర్ ఆరంభంలో కాంక్రీట్ పిచ్‌లపై బంతిని టర్న్ చేస్తూ బౌలింగ్ ప్రాక్టీస్ చేయడంతోనే.. ఇప్పుడు ఎలాంటి పిచ్‌లపైనా సులువుగా బంతిని తిప్పగలుగుతున్నానని భారత మణికట్టు స్పిన్నర్ కుల్దీప్ యాదవ్ వెల్లడించాడు. ఈ ఏడాది మార్చిలో ఆస్ట్రేలియాతో జరిగిన టెస్టు సిరీస్‌తో టీమిండియాలోకి అరంగేట్రం చేసిన కుల్దీప్.. అతి తక్కువ రోజుల్లోనే జట్టులో సుస్థిర స్థానం సంపాదించుకున్నాడు. ఇటీవల ఆస్ట్రేలియాతో ముగిసిన వన్డే సిరీస్‌లోనూ హ్యాట్రిక్ వికెట్లు తీసి అందర్నీ ఆశ్చర్యపరిచాడు. న్యూజిలాండ్‌తో ఆదివారం నుంచి ఆరంభంకానున్న వన్డే సిరీస్ కోసం సిద్ధమవుతున్న ఈ యువ స్పిన్నర్ మీడియాతో తాజాగా మాట్లాడాడు.

‘ఏ పిచ్‌పై మ్యాచ్ ఆడినా నాలో కంగారేమీ ఉండదు. ఎందుకంటే.. నా చిన్నతనంలో సిమెంట్‌తో తయారు చేసిన ట్రా‌క్‌పై బౌలింగ్ ప్రాక్టీస్ చేసేవాడ్ని. ఆ కాంక్రీట్‌ పిచ్‌లపై బంతి‌ని తిప్పగలిగితే.. ఇక ఎలాంటి పిచ్‌పైనైనా టర్న్ రాబట్టేయచ్చు. బంతి‌ని విసరడంలో వైవిధ్యం చూపుతూ.. బ్యాట్స్‌మెన్‌ ఆలోచనకి చిక్కకుండా బంతిని డాట్ చేయగలిగితే.. ఎక్కడైనా విజయం సాధించొచ్చు’ అని కుల్దీప్ యాదవ్ వివరించాడు. ఆదివారం వాంఖడే వేదికగా తొలి వన్డే జరగనుంది.