తొలి సిరీస్ గెలిచిన కోహ్లికి గిఫ్ట్ ఇచ్చిన ధోని

కెప్టెన్‌గా విరాట్ కోహ్లి పూర్తి స్థాయిలో పగ్గాలు చేపట్టిన తర్వాత భారత క్రికెట్ జట్టు తొలి వన్డే సిరీస్‌ను కైవసం చేసుకుంది. దీంతో తొలి వన్డే సిరీస్ గెలుచుకున్న కోహ్లికి మాజీ కెప్టెన్ మహేంద్ర సింగ్ ధోనీ ఓ జ్ఞాపికను అందించాడు. ఈ విషయాన్ని కోహ్లినే స్వయంగా వెల్లడించాడు. పూర్తిస్థాయి కెప్టెన్‌గా బాధ్యతలు స్వీకరించాక.. తొలి సిరీస్ సాధించినందుకు గానూ.. మహీ భాయ్ తాను సంతకం చేసిన బంతిని జ్ఞాపికగా ఇచ్చాడని విరాట్ తెలిపాడు.

రెండో వన్డేలో విజయం తర్వాత ధోనీ ఈ బంతిని తనకు అందించినట్లు చెప్పిన కోహ్లి... ఇది తనకెంతో ప్రత్యేకమైన గిఫ్ట్ అన్నాడు. టెస్టు కెప్టెన్‌గా కోహ్లి భారత జట్టును టెస్టుల్లో నంబర్ 1 స్థానంలో నిలబెట్టడంతో... వచ్చే ప్రపంచ కప్‌ను దృష్టిలో ఉంచుకొని ధోనీ ఇటీవలే నాయకత్వ బాధ్యతల నుంచి వైదొలిగి పూర్తి స్థాయి కెప్టెన్‌గా విరాట్ బాధ్యతలు చేపట్టడానికి మార్గం సుగమం చేసిన సంగతి తెలిసిందే.

'I got the match ball signed from #MSDhoni' - #ViratKohli Such a sweet gesture ❤@msdhoni @imVkohli pic.twitter.com/Ykz747mIRt — Captains (@DhoniKohliFever) January 23, 2017
ఇంగ్లండ్‌తో జరిగిన వన్డే సిరీస్‌‌లో మూడు అంశాలను తాను చాలా కాలంపాటు గుర్తుంచుకుంటానని కోహ్లి చెప్పాడు. తొలి వన్డేలో కేదార్ జాదవ్ అద్భుతంగా బ్యాటింగ్ చేయడం మొదటిది కాగా.. రెండో వన్డేలో ధోనీ, యువీ సెంచరీలతో జట్టును గెలిపించిన తీరు.. చివరి ఓవర్లో భువనేశ్వర్ కుమార్ బౌలింగ్ వేసిన విధానం ఎంతో నచ్చిందని, తాను ఈ మూడు విషయాలను చాలా కాలం వరకూ మర్చిపోనని కోహ్లి తెలిపాడు. మూడో వన్డేలో హార్ధిక్ పాండ్య, కేదార్ జాదవ్ పోరాడిన తీరు అద్భుతమన్నాడు. ఇంగ్లండ్‌తో జరిగిన మూడు వన్డేల సిరీస్‌ను టీమిండియా 2-1 తేడాతో గెలుపొందిన సంగతి తెలిసిందే.