ఛాంపియన్స్ ట్రోఫీలో భారత్ గెలవాలంటే..?

ఇంగ్లాండ్‌లో జూన్ 1 నుంచి జరగనున్న ఛాంపియన్స్ ట్రోఫీని భారత్ గెలవాలంటే.. అక్కడి పరిస్థితులకు బ్యాట్స్‌మెన్ వేగంగా అలవాటు పడాలని టీమిండియా మాజీ కోచ్ జాన్ రైట్ సూచించారు. మిగతా జట్లతో పోలిస్తే భారత్ జట్టు బౌలింగ్ విభాగం పటిష్టంగా ఉందని.. అయితే టాప్ ఆర్డర్ బ్యాట్స్‌మెన్ ఫామ్ కొంత ఆందోళన కలిగిస్తోందని రైట్ వివరించారు. 2013లో జరిగిన ఛాంపియన్స్ ట్రోఫీలో విజేతగా నిలిచిన టీమిండియా డిఫెండింగ్ ఛాంపియన్‌గా టోర్నీలో బరిలోకి దిగనుంది. కెప్టెన్‌గా బాధ్యతలు స్వీకరించిన తర్వాత విరాట్ కోహ్లికి ఇదే తొలి ఐసీసీ టోర్నీ.

‘అనిల్ కుంబ్లే లాంటి కోచ్ ఉండటం భారత్ జట్టుకు కలిసొచ్చే అంశం. పరిస్థితులకు అనుగుణంగా మ్యాచ్ వ్యూహాలను రచించడంలో అతను దిట్ట. టీమిండియా పేస్ విభాగం ప్రస్తుతం చాలా పటిష్టంగా ఉంది. కానీ.. టాప్ ఆర్డర్‌పై కుంబ్లే దృష్టి కేంద్రీకరించాలి. ఛాంపియన్స్ ట్రోఫీ జరిగే సమయంలో ఇంగ్లాండ్‌లో ఎండలు ఎక్కువగా ఉంటాయి. కాబట్టి పిచ్‌లు పేసర్లకి అనుకూలించవచ్చు. అక్కడి పరిస్థితులకి వేగంగా బ్యాట్స్‌మెన్ అలవాటు పడితే భారత్‌దే విజయం’ అని జాన్‌రైట్ ధీమా వ్యక్తం చేశారు. జూన్ 4న భారత్ తన తొలి మ్యాచ్‌లోనే పాకిస్థాన్‌తో ఢీకొననుంది.