ఐపీఎల్ 2021 ముంగిట CSK ఫ్యాన్స్‌కి గుడ్ న్యూస్..!

ఐపీఎల్ 2021 సీజన్ ముంగిట చెన్నై సూపర్ కింగ్స్‌ అభిమానులకి ఉత్సాహానిచ్చే వార్త. వ్యక్తిగత కారణాలతో ఐపీఎల్ 2020 నుంచి అర్ధాంతరంగా తప్పుకున్న స్టార్ బ్యాట్స్‌మెన్ సురేశ్ రైనా.. వచ్చే ఏడాది మళ్లీ చెన్నైకి ఆడబోతున్నాడు. ఈ విషయాన్ని తాజాగా చెన్నై సూపర్ కింగ్స్ అధికారి ఒకరు ధ్రువీకరించారు. ఐపీఎల్ 2020 సీజన్‌లో పేలవ ప్రదర్శనతో నిరాశపరిచిన చెన్నై సూపర్ కింగ్స్.. పాయింట్ల పట్టికలో 7వ స్థానంతో సరిపెట్టిన విషయం తెలిసిందే. ఐపీఎల్ చరిత్రలో చెన్నై టీమ్ ప్లేఆఫ్‌కి చేరుకుండా ఇలా నిష్క్రమించడం కూడా ఇదే తొలిసారి.

‘‘సురేశ్ రైనా చెన్నై టీమ్‌తోనే ఉంటాడు. అతడ్ని వదులుకునే ఆలోచన ఫ్రాంఛైజీకి లేదు’’ అని ముంబయి మిర్రర్‌తో చెన్నై సూపర్ కింగ్స్ అధికారి ఒకరు స్పష్టం చేశారు. వాస్తవానికి ఐపీఎల్ 2020 సీజన్‌లో ఆడేందుకు యూఏఈకి వెళ్లిన రైనా.. చెన్నై టీమ్‌లో కరోనా వైరస్ కేసులు పెరుగుతుండటంతో స్వదేశానికి వచ్చేశాడని అప్పట్లో వార్తలు వచ్చాయి. అలానే తనకి రూమ్‌ని కేటాయించే విషయంలోనూ చెన్నై టీమ్ మేనేజ్‌మెంట్‌తో అతను గొడవపడినట్లు కూడా అప్పట్లో ప్రచారం నడిచింది. దాంతో.. మళ్లీ చెన్నై తరఫున అతను ఆడటం అనుమానమేనని మాజీ క్రికెటర్లు చెప్పుకొచ్చారు. కానీ.. చిన్న తలాపై చెన్నై ఫ్రాంఛైజీ నమ్మకం ఉంచబోతున్నట్లు తెలుస్తోంది.

2008 నుంచి ఐపీఎల్ జరుగుతుండగా.. తొలి సీజన్ నుంచి చెన్నై సూపర్ కింగ్స్‌ తరఫునే సురేశ్ రైనా టోర్నీలో ఆడుతున్నాడు. మధ్యలో 2016, 2017లో నిషేధం కారణంగా టోర్నీకి చెన్నై దూరమవగా.. ఆ రెండేళ్లు గుజరాత్ లయన్స్‌కి ఆడిన రైనా.. మళ్లీ చెన్నై రీఎంట్రీ తర్వాత టీమ్‌లోకి వచ్చేశాడు. చెన్నై టీమ్‌లో అత్యధిక పరుగులు చేసిన ఆటగాడిగా రైనా 4,527 పరుగులతో కొనసాగుతున్నాడు.