ఐపీఎల్ వాయిదా నాకు మేలు చేసింది: చాహర్

కరోనా వైరస్ కారణంగా ఐపీఎల్ 2020 సీజన్‌ని భారత క్రికెట్ నియంత్రణ మండలి (బీసీసీఐ) వాయిదా వేయడం వ్యక్తిగతంగా తనకి లాభించిందని టీమిండియా ఫాస్ట్ బౌలర్ దీపక్ చాహర్ వెల్లడించాడు. గత ఏడాది డిసెంబరులో వెన్ను గాయం కారణంగా భారత్ జట్టుకి దూరమైన చాహర్.. బెంగళూరులోని నేషనల్ క్రికెట్ అకాడమీ (ఎన్‌సీఏ)లో ఫిట్‌నెస్ సాధించేందుకు గత వారం వరకూ శ్రమించాడు. కానీ.. కరోనా వైరస్ వ్యాప్తి నేపథ్యంలో ఎన్‌సీఏని మూసివేయగా ఈ పేసర్ ప్రస్తుతం ఇంటి వద్ద జిమ్‌లో చెమటోడ్చుతున్నట్లు చెప్పుకొచ్చాడు.

Read More: బాబోయ్.. ధోనీకి బౌలింగ్ చేయకూడదు: మెక్లనగాన్

మార్చి 29 నుంచి ఐపీఎల్ 2020 సీజన్ ప్రారంభంకావాల్సి ఉండగా.. దేశంలో కరోనా వైరస్ వేగంగా విస్తరిస్తుండటంతో ఏప్రిల్ 15 వరకూ బీసీసీఐ వాయిదా వేసిన విషయం తెలిసిందే. ఒకవేళ షెడ్యూల్ ప్రకారం మార్చి 29న ఐపీఎల్ ప్రారంభమై ఉంటే..? తాను కచ్చితంగా కొన్ని ఐపీఎల్ మ్యాచ్‌లకి దూరంగా ఉండాల్సి వచ్చేదని దీపక్ చాహర్ వెల్లడించాడు. 2019 ఐపీఎల్ సీజన్‌లో చెన్నై సూపర్ కింగ్స్ తరఫున 17 మ్యాచ్‌లాడిన దీపక్ చాహర్ 22 వికెట్లు పడగొట్టాడు.

Read More:కరోనా వైరస్‌పై ఫ్యాన్స్‌కు సీఎస్‌కే అప్పీల్‌
‘‘వ్యక్తిగతంగా చెప్పాలంటే.. దేశంలో కరోనా వైరస్ కారణంగా నాకు ఫిట్‌నెస్ సాధించేందుకు అదనపు సమయం దొరికింది. ఒకవేళ ఐపీఎల్ 2020 సీజన్ మార్చి 29 నుంచి స్టార్ట్ అయ్యుంటే..? కొన్ని ప్రారంభ మ్యాచ్‌లకి నేను దూరంగా ఉండాల్సి వచ్చేది’’ అని దీపక్ చాహర్ వెల్లడించాడు. ప్రస్తుతానికి గాయం నుంచి పూర్తిగా ఫిట్‌నెస్ సాధించలేకపోయినా.. ఏప్రిల్ 15నాటికి మాత్రం తాను ఫుల్ ఫిట్‌నెస్‌తో మైదానంలోకి అడుగుపెడతానని చాహర్ ధీమా వ్యక్తం చేశాడు.