భార్య కోసం నేత్రదానం చేయనున్న అశ్విన్

భారత ఆఫ్ స్పిన్నర్ రవిచంద్రన్ అశ్విన్ తన భార్య ప్రీతి నారాయణన్ కోరికను నెరవేర్చాడు. ఇటీవలే తండ్రయిన అశ్విన్ మరణానంతరం తన నేత్రాలను దానం చేసేందుకు అంగీకరిస్తూ.. హమీపత్రం మీద సంతకం చేశాడు. నేత్ర దానం చేయడం అనేది తన భార్య చిరకాల వాంఛ అని అశ్విన్ చెప్పుకొచ్చాడు. కళ్లను దానం చేయడం ద్వారా.. అంధులకు చూపును ప్రసాదించవచ్చనే మంచి లక్ష్యంతో ఈ నిర్ణయం తీసుకున్న అశ్విన్‌పై నెటిజన్లు ప్రశంసల జల్లు కురిపిస్తున్నారు.

నేత్రదాన పత్రంపై సంతకాలు చేస్తున్న ఫొటోను ట్వీటర్లో ఉంచిన అశ్విన్.. అభిమానులు కూడా ఈ మంచి కార్యక్రమంలో పాలుపంచుకోవాలని కోరాడు. భవిష్యత్తులో తాను రోడ్డు భద్రతను పెంపొందించేందుకు, పరిశుభ్రత పట్ల అవగాహన కల్పించేందుకు కృషి చేస్తానని అశ్విన్ ఈ సందర్భంగా వెల్లడించాడు.

This eye donation has been on @prithinarayanan dream list for a long time now.#letscontribute pic.twitter.com/nh9Q0PbJDZ— Ashwin Ravichandran (@ashwinravi99) January 7, 2017
భారత్‌లో దాదాపు రెండు కోట్ల మంది కంటి సంబంధ సమస్యలతో బాధపడుతుండగా ఉండగా.. వీరిలో 68 మంది లక్షల మంది కార్నియాకు సంబంధించిన అంధత్వం వల్ల బాధపడుతున్నారు. కార్నియాను మార్చడం వల్ల వారికి తిరిగి చూపును ప్రసాదించే వీలుంది. ఈ విషయం పట్ల అవగాహన లేకపోవడం వల్ల చాలా మంది చనిపోయిన వారి కళ్లను దానం ఇవ్వడం లేదు.

Just finished pledging my eyes !!#letscontribute pic.twitter.com/C7kKhLwJb0— Ashwin Ravichandran (@ashwinravi99) January 7, 2017
చెన్నైలోని రాజన్ ఐ కేర్ ఇప్పటి వరకూ ఏడు వేల మందికి ఉచితంగా కార్నియా మార్పిడి శస్త్రచికిత్సలు చేసింది. కానీ దాతలు లేకపోవడంతో ఆపరేషన్లు ఆలస్యం అవుతున్నాయని ఆ సంస్థ చైర్మన్ డాక్టర్ మోహన్ రాజన్ తెలిపారు. అందుకే సెలబ్రిటీలతో ఈ విషయమై అవగాహన కల్పిస్తున్నామన్నారు. గతంలో రాహుల్ ద్రవిడ్, ఆడమ్ గిల్ క్రిస్ట్‌తోపాటు న్యూజిలాండ్ జట్టు సభ్యులందరూ నేత్రదానం చేసేందుకు ముందుకొచ్చారు.