సురేశ్ రైనాకి తప్పిన ప్రమాదం

భారత బ్యాట్స్‌మెన్ సురేశ్ రైనాకి పెను ప్రమాదం తప్పింది. ప్రస్తుతం టీమిండియాలో చోటు కోల్పోయి దేశవాళీ టోర్నీ దులీప్ ట్రోఫీ ఆడుతున్న రైనా.. మంగళవారం మ్యాచ్ కోసం ఒంటరిగా కాన్పూర్ వెళ్తుండగా అతని రేంజ్ రోవర్ కారు టైరు పేలిపోయింది. అయితే.. అదృష్ట‌వ‌శాత్తు అతనికి ఎలాంటి ప్రమాదం జరగలేదని పోలీసులు తెలిపారు. కారులో స్పేర్ టైర్ లేకపోవడంతో పోలీసులే ఒక వాహనాన్ని సురేశ్ రైనాకి సమకూర్చి స్టేడియానికి పంపించారు. కారు‌ని అధిక వేగంతో నడపడంతోనే ఈ ప్రమాదం జరిగినట్లు పోలీసులు చెప్తున్నారు.

దులీప్ ట్రోఫీలో ఇండియా బ్లూ జట్టుకి కెప్టెన్‌గా వ్యవహరిస్తున్న సురేశ్ రైనాపై భారత సెలక్టర్లు గత కొంతకాలంగా మొండిచేయి చూపుతున్నారు. అతను 2015 అక్టోబరులో చివరిసారిగా భారత్ తరఫున వన్డే మ్యాచ్ ఆడాడు. ఫిటెనెస్ కోసం ఇటీవల నిర్వహించిన యో- యో టెస్టులో కూడా ఈ హిట్టర్ విఫలమవడంతో ఆదివారం నుంచి ఆస్ట్రేలియాతో ప్రారంభంకానున్న వన్డే సిరీస్‌కి సురేశ్ రైనా ఎంపికవలేదు.