ధోనీ ఫుల్ క్లారిటీ.. ఫైనలైనా మీటింగ్ 2 నిమిషాలే: పార్థీవ్ పటేల్

ఐపీఎల్‌లో చెన్నై సూపర్ కింగ్స్‌ కెప్టెన్ మహేంద్రసింగ్ ధోనీ ఆటగాళ్ల విషయంలో ఎప్పుడూ ఫుల్ క్లారిటీతో ఉండేవాడని ఆ జట్టు మాజీ వికెట్ కీపర్ పార్థీవ్ పటేల్ తాజాగా వెల్లడించాడు. 2008 ఐపీఎల్ సీజన్ ఫైనల్‌కి ముందు కేవలం రెండు నిమిషాల్లోనే టీమ్ మీటింగ్‌ని కెప్టెన్ ధోనీ ముగించాడని గుర్తు చేసుకున్న పార్థీవ్ పటేల్.. గతంతో పోలిస్తే ఇప్పుడు టీమ్ ప్రణాళికలు పూర్తిగా మారిపోయాయని చెప్పుకొచ్చాడు. గత కొన్ని సీజన్లుగా రాయల్ ఛాలెంజర్స్ బెంగళూరు తరఫున పార్థీవ్ పటేల్ ఆడుతున్న విషయం తెలిసిందే.

Read More: రిటైర్మెంట్‌పై స్పందించిన ధోనీ చిన్న‌నాటి కోచ్‌
‘‘2008 ఐపీఎల్ ఫైనల్‌కి ముందు టీమ్ మీటింగ్‌ని ధోనీ కేవలం రెండు నిమిషాల్లోనే ముగించేశాడు. నా అంచనా ప్రకారం 2019 ఐపీఎల్ ఫైనల్లోనూ ధోనీ అంతకంటే తక్కువ సమయంలోనే మీటింగ్‌ని పూర్తి చేసి ఉంటాడు. ఆటగాళ్ల విషయంలో ధోనీ ఎప్పుడూ పూర్తి క్లారిటీతో ఉంటాడు. ఎవరి నుంచి ఎలా అత్యుత్తమ ప్రదర్శన రాబట్టాలో..? అతనికి బాగా తెలుసు. మునుపటితో పోలిస్తే ఐపీఎల్ ప్రణాళికలు, వ్యూహాలు ఇప్పుడు పూర్తిగా మారిపోయాయి. గతంలో చివరి 5 ఓవర్లలో 30 నుంచి 36 పరుగులు రాబట్టాలని ప్లాన్ వేసుకునేవాళ్లం. కానీ.. ఇప్పుడు చివరి ఐదు ఓవర్లలో ఏకంగా 50 నుంచి 60 పరుగులు రాబట్టేస్తున్నారు’’ అని పార్థీవ్ పటేల్ వెల్లడించాడు.

Read More: మెంటల్ వచ్చిందా..? ధోనీ రిటైర్మెంట్‌ రూమర్స్‌పై సాక్షి ఫైర్
మహేంద్రసింగ్ ధోనీ కంటే ముందే భారత్ జట్టులోకి ఎంట్రీ ఇచ్చిన పార్థీవ్ పటేల్.. ధోనీ రాకతో క్రమంగా అంతర్జాతీయ క్రికెట్‌కి దూరమయ్యాడు. కానీ.. ఐపీఎల్‌లో మాత్రం అతను రెగ్యులర్‌గా కొనసాగుతున్నాడు. అయితే.. ఏ జట్టులోనూ సుదీర్ఘకాలం ఆడటం లేదు. ఇప్పటి వరకూ 12 ఐపీఎల్ సీజన్లు ముగియగా.. ఆరు టీమ్స్‌కి అతను మారాడు.