5 భారత వికెట్లు తీస్తే.. స్టెయిన్ టాప్

దక్షిణాఫ్రికా ఫాస్ట్ బౌలర్ డేల్ స్టెయిన్ కెరీర్‌లో అరుదైన మైలురాయికి అత్యంత చేరువలో ఉన్నాడు. గత ఏడాది కాలంగా భుజం గాయంతో క్రికెట్‌కి దూరంగా ఉన్న స్టెయిన్.. శుక్రవారం నుంచి భారత్‌తో జరగనున్న తొలి టెస్టుతో పునరాగమనం చేయనున్నాడు. కేప్‌ టౌన్ వేదికగా జరిగే ఈ టెస్టులో స్టెయిన్ ఐదు వికెట్లు పడగొట్టగలిగితే.. దక్షిణాఫ్రికా తరఫున అత్యధిక వికెట్లు తీసిన బౌలర్‌గా రికార్డుల్లోకెక్కనున్నాడు. కెరీర్‌లో మొత్తం 108 టెస్టులాడిన సఫారీ దిగ్గజ బౌలర్ షాన్ పొలాక్ 421 వికెట్లతో ప్రస్తుతం అగ్రస్థానంలో ఉండగా.. కేవలం 85 టెస్టుల్లోనే డేల్ స్టెయిన్ 417 వికెట్లతో ఆ రికార్డుని సమీపించాడు.

2004లో టెస్టు క్రికెట్‌లోకి అరంగేట్రం చేసిన స్టెయిన్ తన వేగం, కచ్చితత్వంతో ప్రపంచంలోనే మేటి పేసర్‌గా గుర్తింపు పొందాడు. సాఫీగా సాగిపోతున్న ఈ బౌలర్‌ కెరీర్‌కి భుజం గాయం బ్రేక్ వేసింది. 2015 డిసెంబరులో తొలిసారి భుజం గాయంతో కొన్ని రోజుల పాటు క్రికెట్‌కి దూరమైన స్టెయిన్.. అనంతరం పునరాగమనం చేసినా.. 2016 నవంబరులో మళ్లీ ఆ గాయం తిరగబెట్టడంతో మూడు శస్త్ర చికిత్సలు చేయాల్సి వచ్చింది. దీంతో దాదాపు 14 నెలల పాటు అతను ఆటకి దూరమయ్యాడు. పునరాగమనంలో స్టెయిన్ ఎలాంటి ప్రదర్శన చేస్తాడోననే ఆసక్తి అందరిలోనూ నెలకొంది. భుజం గాయం అతడి వేగాన్ని తగ్గిస్తుందని మాజీ క్రికెటర్లు అభిప్రాయపడుతున్నారు.