మూడేళ్ల తర్వాత ఆసీస్ టీ20 జట్టులోకి స్టీవ్‌స్మిత్

ఇంగ్లాండ్‌తో ఇటీవల ముగిసిన యాషెస్ టెస్టు సిరీస్‌లో శతకాల మోత మోగించిన ఆస్ట్రేలియా మాజీ కెప్టెన్ స్టీవ్‌స్మిత్.. మూడేళ్ల తర్వాత టీ20 జట్టులో చోటు దక్కించుకున్నాడు. త్వరలో శ్రీలంక, పాకిస్థాన్‌‌తో జరగనున్న టీ20 సిరీస్‌ కోసం క్రికెట్ ఆస్ట్రేలియా (సీఏ) ఈరోజు 14 మందితో కూడిన టీమ్‌ని ప్రకటించింది. స్టీవ్‌స్మిత్ చివరిగా 2016‌లో భారత్‌పై మొహాలిలో వేదికగా ఆసీస్ తరఫున టీ20 మ్యాచ్ ఆడాడు.

ఆస్ట్రేలియా టీ20 జట్టు: అరోన్ ఫించ్ (కెప్టెన్), డేవిడ్ వార్నర్, స్టీవ్‌స్మిత్, అస్గన్ అగర్, అలెక్స్ క్యారీ (వికెట్ కీపర్), పాట్ కమిన్స్, గ్లెన్ మాక్స్‌వెల్, బెన్ డెన్‌మార్ట్, కేన్ రిచర్డ్‌సన్, బిల్లీ స్టాన్‌లేక్, మిచెల్ స్టార్క్, అస్టన్ టర్నర్, ఆండ్రూ టై, ఆడమ్ జంపా

‘ఆస్ట్రేలియా గడ్డపై వచ్చే ఏడాది టీ20 ప్రపంచకప్ జరగనుంది. ఆ టోర్నీని దృష్టిలో పెట్టుకుని జట్టుని ఎంపిక చేశాం. దాదాపు ఇదే టీమ్ వచ్చే ఏడాది టీ20 ప్రపంచకప్‌లో బరిలోకి దిగే అవకాశం ఉంది’ అని ఆస్ట్రేలియా టీమ్ సెలక్టర్ ట్రేవర్ వెల్లడించాడు.

ఇంగ్లాండ్ గడ్డపై ఇటీవల ముగిసిన వన్డే ప్రపంచకప్‌లో 87 పరుగులతో నిరాశపరిచిన ఆల్‌రౌండర్ మార్కస్ స్టాయినిస్‌పై వేటు పడగా.. పవర్ హిట్టర్ క్రిస్‌లిన్, యువ బ్యాట్స్‌మెన్ డీఆర్క్ షాట్‌, సీనియర్ స్పిన్నర్ నాథన్ లయన్‌లను సెలక్టర్లు పరిగణలోకి తీసుకోలేదు. బాల్ టాంపరింగ్ కారణంగా ఏడాది నిషేధానికి గురైన స్టీవ్‌స్మిత్, డేవిడ్ వార్నర్ సుదీర్ఘ విరామం తర్వాత మళ్లీ ఆసీస్ తరఫున టీ20 మ్యాచ్‌లు ఆడబోతున్నారు.