మలాన్-బట్లర్ వరల్డ్ రికార్డ్.. సౌతాఫ్రికాపై టీ20 సిరీస్ క్లీన్‌స్వీప్ చేసిన ఇంగ్లాండ్

దక్షిణాఫ్రికాతో జరిగిన మూడో టీ20లో ఇంగ్లాండ్ 9 వికెట్ల తేడాతో ఘన విజయం సాధించింది. 192 పరుగుల లక్ష్యంతో బరిలో దిగిన ఇంగ్లిష్ జట్టు మరో 14 బంతులు మిగిలి ఉండగానే విజయం సాధించింది. ఓపెనర్ జేసన్ రాయ్ 16 పరుగులకే ఔటైనా.. అతడి స్థానంలో బ్యాటింగ్‌కు దిగిన డేవిడ్ మలాన్ 47 బంతుల్లోనే 99 పరుగులతో నాటౌట్‌గా నిలిచాడు. మరో ఓపెనర్ జాస్ బట్లర్ 46 బంతుల్లో 67 పరుగులు చేయడంతో ఇంగ్లాండ్ సునాయాసంగా విజయం సాధించింది.

మలాన్-బట్లర్ జోడి రెండో వికెట్‌కు 90 బంతుల్లోనే 167 పరుగులు జోడించి ప్రపంచ రికార్డ్ క్రియేట్ చేశారు. ఈ విజయంతో ఇంగ్లాండ్ 3-0 తేడాతో సిరీస్‌ను క్లీన్‌స్వీప్ చేసింది. మలాన్ మ్యాన్ ఆఫ్ ది సిరీస్‌గా నిలిచాడు.

మూడో టీ20లో టాస్ గెలిచిన బ్యాటింగ్ ఎంచుకున్న సౌతాఫ్రికా 9.3 ఓవర్లలో 3 వికెట్ల నష్టానికి 64 పరుగులే చేసింది. కానీ డుపెస్లిస్ (37 బంతుల్లో 52 నాటౌట్), వాన్ డెర్ డస్సెన్ (32 బంతుల్లో 74 నాటౌట్) దూకుడుగా ఆడారు. వీరిద్దరూ నాలుగో వికెట్‌కు అజేయంగా 66 బంతుల్లోనే 127 పరుగులు జోడించారు.