ఢిల్లీ డేర్‌డెవిల్స్ మెంటార్‌గా అనిల్ కుంబ్లే..?

ఐపీఎల్‌లో గత కొన్ని సీజన్లుగా పేలవ ప్రదర్శనతో నిరాశపరుస్తున్న ఢిల్లీ డేర్‌డెవిల్స్‌ జట్టుని వెనకుండి నడిపించే బాధ్యతను అనిల్ కుంబ్లే తీసుకోనున్నాడా..? అంటే అవుననే సమాధానాలు వినిపిస్తున్నాయి. భారత జట్టు కోచ్‌గా గత ఏడాది మధ్యలో అనూహ్యంగా తప్పుకున్న అనిల్ కుంబ్లే‌.. అప్పటి నుంచి ఏ కొత్త బాధ్యతనీ తీసుకోలేదు. దీంతో.. వచ్చే ఏడాది ఐపీఎల్‌‌‌లో ఢిల్లీ డేర్‌డెవిల్స్‌ జట్టుకి మెంటార్‌గా పనిచేయాలని ఇటీవల జట్టు ఫ్రాంఛైజీ అతడ్ని కోరిందట. దీనిపై ఈ మాజీ స్పిన్నర్ కూడా సానుకూలంగానే స్పందించినట్లు తెలుస్తోంది.

‘ఢిల్లీ డేర్‌డెవిల్స్‌ మెంటార్ బాధ్యతలపై ఇటీవల అనిల్ కుంబ్లేతో మేము చర్చించాం. అతడ్ని ఒప్పించగలిగితే.. కచ్చితంగా మేము గొప్ప విజయం సాధించినట్లే’ అని ఢిల్లీ డేర్‌డెవిల్స్ ఫ్రాంఛైజీ వెల్లడించింది. భారత కోచ్‌గా అనిల్ కుంబ్లే పనిచేస్తున్న సమయంలో.. హెడ్‌మాస్టర్‌గా అతను వ్యవహరిస్తున్నాడంటూ బీసీసీఐకి కెప్టెన్ కోహ్లీతో సహా ఆటగాళ్లందరూ ఫిర్యాదు చేశారు. ఆటగాళ్ల క్రమశిక్షణ విషయంలో కఠినంగా ఉండటమే అతడ్ని దోషిగా నిలబెట్టింది. దీంతో.. కోచ్‌గా మళ్లీ ఎంపికయ్యే అవకాశం ఉన్నా.. హుందాగా రాజీనామా చేసి బాధ్యతల నుంచి తప్పుకున్నాడు.