డెన్మార్క్ ఓపెన్‌లో కిదాంబి శ్రీకాంత్ ఓటమి

డెన్మార్క్ ఓపెన్‌లో భారత స్టార్ షట్లర్ కిదాంబి శ్రీకాంత్ పోరాటం ముగిసింది. జపాన్ షట్లర్ కెంటో మోమోటోతో శనివారం సెమీ ఫైనల్లో తలపడిన కిదాంబి శ్రీకాంత్ వరుస సెట్లలో 16-21, 12-21 తేడాతో పరాజయాన్ని చవిచూశాడు. ఈ టోర్నీలోనే దిగ్గజ షట్లర్ లిన్‌డాన్‌ని ఓడించి సూపర్ ఫామ్‌లో కనిపించిన శ్రీకాంత్.. సెమీస్‌లో వెనుదిరగడం భారత్‌ అభిమానుల్ని నిరాశపరిచింది.

తొలి సెట్‌ని 3-5తో పేలవంగా ఆరంభించిన కిదాంబి శ్రీకాంత్.. ఆ తర్వాత వరుసగా నాలుగు పాయింట్లు సాధించి 7-5తో పుంజుకున్నట్లు కనిపించాడు. కానీ.. ప్రపంచ ఛాంపియన్ అయిన మోమోటో.. శ్రీకాంత్‌కి ఎక్కువ అవకాశాలివ్వలేదు. ఈ క్రమంలోనే 15-11తో ఆధిక్యాన్ని అందుకున్న జపాన్ షట్లర్.. తొలిసెట్‌ని అలవోకగా చేజిక్కించుకున్నాడు.

లిన్‌డాన్‌తో మ్యాచ్‌లోనూ ఇలానే తొలి సెట్‌ని చేజార్చుకున్న శ్రీకాంత్.. తర్వాత రెండు సెట్లని గెలుపొందిన నేపథ్యంలో.. భారత్ అభిమానులు ఆశలు వదిలేయలేదు. కానీ.. రెండో సెట్‌లోనూ ఆరంభంలోనే మోమోటో 7-4తో ఆధిక్యంలోకి దూసుకెళ్లి.. చూస్తుండగానే 11-7, 16-10తో విజయానికి చేరువైపోయాడు. దీంతో.. శ్రీకాంత్‌కి నిరాశ తప్పలేదు. మరో స్టార్ షట్లర్ పీవీ సింధు తొలి రౌండ్‌లోనే ఇంటిబాట పట్టిన విషయం తెలిసిందే.