కోహ్లీ 10ఏళ్ల నాటి రికార్డ్ బ్రేక్.. శుభమన్ గిల్ టాప్

భారత టెస్టు జట్టులోకి ఇటీవల ఎంపికైన యువ ఓపెనర్ శుభమన్ గిల్‌కి దక్షిణాఫ్రికాతో సిరీస్‌లో మాత్రం తుది జట్టులో అవకాశం దక్కలేదు. అయితే.. తాజాగా దేశవాళీ క్రికెట్‌లో ఆడుతున్న గిల్ 10 ఏళ్ల నాటి విరాట్ కోహ్లీ రికార్డ్‌ని బద్దలు కొట్టాడు.

దేవధర్ ట్రోఫీ 2019-20లో భాగంగా రాంచీలో భారత్ - బి, భారత్- సి జట్లు ఈరోజు ఫైనల్లో తలపడ్డాయి. సి జట్టుకి కెప్టెన్‌గా ఉన్న శుభమన్ గిల్ ఒక్క పరుగుకే ఔటైనా.. దేవధర్ ట్రోఫీ ఫైనల్‌లో జట్టుకి కెప్టెన్సీ వహించిన పిన్న వయస్కుడిగా అరుదైన ఘనత సాధించాడు. ఈ క్రమంలో విరాట్ కోహ్లీ 10 ఏళ్ల క్రితం నెలకొల్పిన రికార్డ్ బద్దలైంది.

విరాట్ కోహ్లీ 2009-10 సీజన్‌లో 21 ఏళ్ల 142 రోజుల వయసులో నార్త్ జోన్ టీమ్‌ని కెప్టెన్‌గా నడిపించాడు. తాజాగా శుభమన్ గిల్ 20 ఏళ్ల 57 రోజుల వయసులోనే ఇండియా- సి జట్టుకి కెప్టెన్‌గా వ్యవహరించి ఆ రికార్డ్‌ని కనుమరుగు చేశాడు.

దక్షిణాఫ్రికాతో ఇటీవల ముగిసిన టెస్టు సిరీస్‌ కోసం ఓపెనర్‌గా శుభమన్ గిల్‌ని సెలక్టర్లు ఎంపిక చేశారు. కానీ.. ఫస్ట్ టెస్టు నుంచి ఓపెనర్ రోహిత్ శర్మ శతకాల మోత మోగించడంతో అతనికి కనీసం తుది జట్టులో కూడా చోటు దక్కలేదు.