ఐసీసీకి కూడా డక్వర్త్-లూయిస్ అర్థంకాదు: ధోనీ

ఇంగ్లండ్‌లో జరుగుతున్న ఐసీసీ ఛాంపియన్స్ ట్రోఫీకి వరణుడు పెద్ద అడ్డంకిగా మారుతున్నాడు. రిజర్వ్ డే లేకపోవడంతో వర్షార్పణం అవుతున్న మ్యాచుల్లో డక్వర్త్-లూయిస్ పద్ధతి ద్వారా విజేతలను నిర్ణయిస్తున్నారు. ఇప్పుడిది ఐసీసీకి పెద్ద తలనొప్పిగా మారింది. ఈ పద్ధతిపై క్రికెట్ అభిమానుల నుంచి తీవ్ర విమర్శలు వస్తున్నాయి. ఈ విమర్శలతో సతమతమవుతున్న ఐసీసీకి తాజాగా మహేంద్ర సింగ్ ధోనీ చురకలు అంటించాడు.

విరాట్ కోహ్లి ఫౌండేషన్ సోమవారం నిర్వహించిన ఓ ఛారిటీ కార్యక్రమంలో టీం ఇండియా సభ్యులు పాల్గొన్నారు. వీళ్లలో మాజీ కెప్టెన్ ఎం.ఎస్.ధోనీ కూడా ఉన్నాడు. ఈ సందర్భంగా ఏర్పాటుచేసిన మీడియా సమావేశంలో ఒక రిపోర్టర్ ధోనీకి ఓ ప్రశ్నను సందించారు. ‘డక్వర్త్-లూయిస్ పద్ధతి గురించి కొంచె అర్థమయ్యేలా చెప్పండి’ అని అడగ్గానే.. ధోనీ అస్సలు తడుముకోకుండా తనదైన శైలిలో చమత్కరించాడు. ‘ఐసీసీకి కూడా ఈ పద్ధతి అర్థమవుతుందని నేననుకోవడంలేదు’ అని నవ్వుతూ సమాధానం ఇచ్చాడు.

అలాగే అంతర్జాతీయ క్రికెట్‌లో మిమ్మల్ని బాగా ఇబ్బంది పెట్టిన బౌలర్ ఎవరని మరో రిపోర్టర్ అడిగిన ప్రశ్నకు కూడా ధోనీ జవాబిచ్చాడు. ‘ఫాస్ట్ బౌలర్లను ఎదర్కోవడం కొంచెం కష్టం. ఇప్పటికీ నాకు క్లిష్టమైన బౌలర్ షోయబ్ అక్తరే. అతను చాలా వేగంగా బంతులను సందించగలడు, యార్కర్లు వేయగలడు, బౌన్సర్లతో భయపెట్టగలడు’ అని ధోనీ చెప్పాడు.