ఫైనల్‌కి ముందు కుంబ్లేతో కోహ్లి గొడవ..?

పాకిస్థాన్‌తో ఛాంపియన్స్ ట్రోఫీకి ముందు ప్రధాన కోచ్ అనిల్ కుంబ్లేతో కెప్టెన్ విరాట్ కోహ్లి గొడవ పడినట్లు తాజాగా ఓ వార్త హల్‌చల్ చేస్తోంది. నెట్స్‌లో జట్టు ప్రాక్టీస్ చేస్తుండగా.. అక్కడికి వచ్చిన కుంబ్లే ఏదో సూచన చేయబోతుండగా కోహ్లి దురుసుగా ప్రవర్తించాడట. అందుకే వెస్టిండీస్ పర్యటన ముగిసే వరకూ కోచ్‌గా కొనసాగేందుకు తొలుత అంగీకరించిన కుంబ్లే.. ఫైనల్ తర్వాత మనసు మార్చుకున్నట్లు తెలుస్తోంది.

గత ఏడాది జూన్‌లో కోచ్‌గా బాధ్యతలు స్వీకరించిన కుంబ్లే జట్టులోని ఆటగాళ్లతో ఆరంభం నుంచి కఠినంగా వ్యవహరిస్తూ వచ్చాడు. తొలుత క్రమశిక్షణ అలవడితే.. జట్టు ప్రదర్శన అదే మెరుగుపడుతుందని అప్పట్లో కుంబ్లే చెప్పుకొచ్చాడు. ఊహించినట్లుగానే ఏడాది పాటు టెస్టుల్లో భారత్ జైత్రయాత్ర కొనసాగించింది. వరుసగా వెస్టిండీస్, న్యూజిలాండ్, ఇంగ్లాండ్, బంగ్లాదేశ్, ఆస్ట్రేలియా జట్లపై విజయకేతనం ఎగురవేసి మళ్లీ టెస్టులో నెం.1 ర్యాంక్‌ని చేజిక్కించుకుంది.

పాకిస్థాన్‌తో ఫైనల్‌కి ముందు నెట్స్‌లో ఆటగాళ్లకి అనిల్ కుంబ్లే సూచనలిస్తుండగా ‘జరిగింది చాలు. మీరు కోచ్‌గా ఉండటం ఇక్కడ ఎవరికీ ఇష్టం లేదు’ అని కోహ్లి దురుసుగా మాట్లాడట. దీంతో మనస్థాపం చెందిన కుంబ్లే మంగళవారం కోచ్‌గా ఒప్పందం గడువు ముగియగానే తప్పుకుంటున్నట్లు ప్రకటించాడు. ఫైనల్లో టాస్ గెలిచిన కోహ్లి ఆశ్చర్యకరంగా ఫీల్డింగ్ ఎంచుకుని తప్పు చేశాడని చాలా మంది క్రికెట్ దిగ్గజాలు విమర్శలు గుప్పించిన విషయం తెలిసిందే. ఒకవేళ అతను ఎవరు సలహాలు తీసుకోకుండా ఆ టాస్ నిర్ణయం తీసుకుని ఉంటే.. నింద కోహ్లినే భరించాలని విమర్శకులు స్పష్టం చేశారు.