ఉమేశ్ యాదవ్ అద్భుత ప్రదర్శనకు కారణాలివే!

ఈ సీజన్లో అత్యుత్తమంగా రాణిస్తోన్న పేస్ బౌలర్ ఎవరైనా ఉన్నారంటే కచ్చితంగా ఉమేశ్ యాదవే. ఈ సీజన్లో అతడు 355.5 ఓవర్లపాటు బౌలింగ్ వేసినా ఏ ఒక్క బంతి కూడా 140 కి.మీ. కంటే తక్కువ వేగంతో వేసింది లేకపోవడం ఆశ్చర్యకరం. కొత్త బంతితో స్వింగ్ చేస్తూ బ్యాట్స్‌మెన్‌ను ఇబ్బంది పెట్టిన ఉమేశ్.. పాత బంతితో రివర్స్ స్వింగ్ చేసి మరింత ఇబ్బంది పెట్టగలిగాడు. అద్భుతమైన ఫిట్‌నెస్, పేస్, బంతిపై చక్కటి నియంత్రణతో నమ్మకమైన బౌలర్‌గా మారాడు. 2015 ప్రపంచకప్‌లో భారత్ తరఫున అత్యధిక వికెట్లు తీసిన బౌలర్‌గా నిలిచిన్పటికీ.. తర్వాత ఉమేశ్ ఇబ్బందులు పడ్డాడు. గాయం కావడంతో టెస్టులకు దూరమయ్యాడు.

ఉమేశ్ ఒకప్పుడు బ్యాట్స్‌మెన్‌కు ధారాళంగా పరుగులిచ్చేవాడు. బంతిపై నియంత్రణ అంతగా ఉండేది కాదు. కానీ ఈ సీజన్లో అవేవీ కనిపించలేదు. ఇతర పేస్ బౌలర్లు మారుతున్నప్పటికీ వరుసగా 12 టెస్టులు ఆడాడు. సరైన ప్రదేశంలో బంతులేస్తూ బ్యాట్స్‌మెన్‌ను ఇబ్బంది పెట్టాడు. ఉమేశ్ మెంటార్, భారత జట్టు మాజీ మీడియం పేసర్ సుబ్రతో బెనర్జీ వల్లే ఇదంతా సాధ్యమైంది. ఉమేశ్ సహజంగానే మంచి అథ్లెట్. అతడి యాక్షన్ బావుంటుంది కానీ కొన్ని లోపాలను మాత్రం సరిచేశా అంటాడాయన.

ఇంగ్లండ్‌తో చివరి టెస్టు ముగిశాక.. క్రిస్మస్ విరామంలో ఉమేశ్ మరోసారి బెనర్జీని కలిశాడు. ఆ సమయంలో బౌలింగ్ యాక్షన్ మెరుగుపర్చుకునేందుకు ఆయన సలహాలిచ్చాడు. భారత జట్టు తరఫున అరంగ్రేటం చేసినప్పటి నుంచి ఉమేశ్ యాదవ్ ఆయనతో రెగ్యులర్‌గా టచ్‌లోనే ఉంటున్నాడు.

బెనర్జీ సలహాల ప్రభావంతో హైదరాబాద్‌లో బంగ్లాదేశ్‌తో జరిగిన టెస్టులో ఉమేశ్ మరింత మెరుగ్గా బంతులేశాడు. సరైన ప్రదేశాల్లో బంతులు విసిరాడు. పరుగులు ఇవ్వడం తగ్గించాడు. దీంతో టీమిండియా బ్యాటిగ్ కోచ్ సంజయ్ బంగర్ అతణ్ని మోస్ట్ ఇంఫ్రూవ్డ్ బౌలర్ అని ప్రశంసించాడు.

బౌలింగ్ మెరుగుపర్చుకోవడం కోసం ఉమేశ్ వెకేషన్లకు వెళ్లడాన్ని కూడా తగ్గించాడు. ఉమేశ్ జట్టులో చోటు కోల్పోయి ఇబ్బంది పడుతున్నప్పుడు అతడి భార్య తాన్యా దగ్గర నుంచి గమనించింది. దీంతో వెకేషన్లకు వెళ్లకున్నా ఫర్వాలేదని నిర్ణయించుకుంది. ఆ సమయాన్న శిక్షణకు కేటాయిస్తే బౌలింగ్ మెరుగుపడుతుందనే ఆలోచన ఆమెది.


ఉమేశ్ ఫిట్‌నెస్ కోసం ఎంతగానో శ్రమిస్తాడు. గత మూడు నాలుగేళ్లలో అతడు గాయాల బారిన పడటం చాలా అరుదు. ఎంతో క్రమశిక్షణతో ఉంటాడు. డైటింగ్ చేస్తున్నప్పుడు అతడికి ఇష్టమైనవి ముందు పెట్టినా వాటిని ముట్టుకోడని తాన్యా గర్వంగా చెప్పింది. ఫిట్‌నెస్ కాపాడుకోవడం, మరింతగా శ్రమించడం, బెనర్జీ సలహాలు.. ఇవే ఉమేశ్ విజయ రహస్యాలు.