Dinesh Karthik: విషమ పరీక్షలో కార్తీక్ సూపర్ సక్సెస్.. ఫినిషర్‌గా ఇక తిరుగులేనట్టేనా?

Dinesh Karthik: టీమిండియా మేనేజ్‌మెంట్ గత కొంత కాలంగా దినేశ్ కార్తీక్‌ను టీ20ల్లో ఫినిషర్‌గా ఆడిస్తోన్న సంగతి తెలిసిందే. తాజాగా దక్షిణాఫ్రికాతో జరిగిన రెండో టీ20లో 19వ ఓవర్‌లో తొలి బంతికే సూర్య రనౌట్ కాగా.. పంత్‌ను కాదని కార్తీక్‌ను టీమిండియా బ్యాటింగ్‌కు దింపింది. తన మీద మేనేజ్‌మెంట్ ఉంచిన నమ్మకాన్ని వమ్ము చేయకుండా.. కార్తీక్ 7 బంతుల్లో 17 పరుగులతో నాటౌట్‌గా నిలిచాడు. రబాడ వేసిన ఆఖరి ఓవర్లో ఓ ఫోర్‌, రెండు సిక్స్‌లు బాది సత్తా చాటాడు.

వాస్తవానికి రబాడను ఎదుర్కోవడం కార్తీక్‌కు విషమ పరీక్ష లాంటిదే. ఎందుకంటే ఈ దక్షిణాఫ్రికా పేసర్ బౌలింగ్‌లో కార్తీక్ తడబడేవాడు. టీ20ల్లో పది ఇన్నింగ్స్‌ల్లో కగిసో రబాడ బౌలింగ్‌ను ఎదుర్కొన్న డీకే.. 30 బంతుల్లో 21 రన్స్ మాత్రమే చేసి నాలుగుసార్లు పెవిలియన్ చేరాడు. రబాడ బౌలింగ్‌లో కార్తీక్ స్ట్రయిక్ రేట్ 70 శాతం మాత్రమే. అతడి టీ20, ఐపీఎల్ స్ట్రయిక్ రేటుతో పోలిస్తే ఇది చాలా తక్కువ.

ఈ నేపథ్యంలో రెండో టీ20లో ఆఖరి ఓవర్లో రబాడను ఎదుర్కొన్న కార్తీక్.. ఓ ఫోర్, రెండు సిక్సులు బాదడంతో ఆ ఓవర్లో మొత్తం 18 రన్స్ వచ్చాయి. ఈ మ్యాచ్‌లో రబాడ బౌలింగ్‌లో అతడు 266కిపైగా స్ట్రయిక్ రేట్‌తో పరుగులు రాబట్టాడు. దీంతో రబాడ బౌలింగ్‌ను సరిగా ఎదుర్కొలేని బలహీనతను డీకే అధిగమించినట్లయ్యింది. టీ20 వరల్డ్‌ కప్‌కు ముందు ఇది భారత్‌కు కచ్చితంగా సంతోషం కలిగించే పరిణామం అనడంలో సందేహం లేదు.

బెస్ట్ ఫినిషర్లలో డీకే ఒకడు..
2018లో జరిగిన నిదహాస్ ట్రోఫీ ఫైనల్లో బంగ్లాదేశ్‌పై చివరి బంతికి సిక్స్ కొట్టిన కార్తీక్ భారత్‌ను గెలిపించాడు. ఆ మ్యాచ్‌లో డీకే 8 బంతుల్లోనే 29 రన్స్‌తో నాటౌట్‌గా నిలిచాడు. అప్పటి నుంచి టీమిండియాలో బెస్ట్ ఫినిషర్‌గా కార్తీక్ గుర్తింపు పొందాడు. ఈ ఏడాది ఐపీఎల్‌లోనూ ఆర్సీబీ కార్తీక్‌ను ఫినిషర్‌గా ఆడించి సక్సెస్ అయ్యింది.

ఎంతటి ఒత్తిడి పరిస్థితుల్లోనైనా కామ్‌గా, కూల్‌గా ఆడటం డీకే‌కు అలవాటు. తన అనుభవాన్ని ఉపయోగించుకుంటూ.. పరిస్థితికి అనుగుణంగా తన ఆటను మార్చుకోవడం.. బౌలర్ ఊహించని రీతిలో షాట్లు ఆడటం కార్తీక్‌‌కు అతిపెద్ద బలం. బౌలర్ ఎవరైనా సరే ఆఖరి ఓవర్లలో బ్యాటింగ్ చేసే కార్తీక్ ఏమాత్రం భయపడడు.

టీ20ల్లో ఆఖరి ఓవర్లో ఇప్పటి వరకూ 58సార్లు బ్యాటింగ్ చేసిన కార్తీక్ 169 బంతులను ఎదుర్కొని 371 పరుగులు చేశాడు. ఈ క్రమంలో 14 సార్లు ఔటయ్యాడు. ఆఖరి ఓవర్లో అతడు 33 ఫోర్లు, 26 సిక్సులు బాదడంతోపాటు.. 219.52 స్ట్రయిక్ రేట్‌తో బ్యాటింగ్ చేశాడు.