స్పిన్ ఆడలేకపోతే వెళ్లొద్దు: ఆసీస్‌కు పీటర్సన్ వార్నింగ్

భారత్, ఆస్ట్రేలియా మధ్య క్రికెట్ మ్యాచ్‌లు ప్రారంభమవుతున్నాయంటే చాలు వాతావరణం కొంచెం వేడెక్కుతుంది. సీనియర్ల కామెంట్లు, ప్లేయర్ల మధ్య విసుర్లు, ఇతర దేశాల జట్లకు చెందిన ఆటగాళ్ల సలహాలు.. ఇలా ఏదో విధంగా వార్తలు వస్తూనే ఉంటాయి. ఇప్పుడు ఇది కూడా అలాంటిదే. ఈనెలలో నాలుగు టెస్టుల సిరీస్ కోసం భారత్‌లో పర్యటించనున్న ఆసీస్ జట్టుకు ఇంగ్లండ్ స్టార్ కెవిన్ పీటర్సన్ ఒక స్వీట్ వార్నింగ్ ఇచ్చాడు. స్పిన్ బౌలింగ్‌ను ఎదుర్కొనే శక్తి లేకపోతే భారత్ వెళ్లొద్దని ఆసీస్ ఆటగాళ్లకు సలహా ఇచ్చాడు.

వాస్తవానికి 2012-13లో భారత పర్యటనకు వచ్చిన ఇంగ్లండ్.. టెస్ట్ సిరీస్‌ను ఎగరేసుకుపోయింది. ఈ సిరీస్‌లో పటిష్ఠమైన భారత స్పిన్ బౌలింగ్‌ను ధైర్యంగా ఎదుర్కొన్న పీటర్సన్, అలెస్టర్ కుక్ జట్టు విజయంలో కీలకపాత్ర పోషించారు. కాగా, గురువారం క్రికెట్ ఆస్ట్రేలియాతో మాట్లాడిన పీటర్సన్ ఆటగాళ్లు స్పిన్‌ను ఎదుర్కోడానికి వీలైనంత త్వరగా సన్నద్ధం కావాలి సూచించాడు. ఒక వేళ స్పిన్ ఆడలేకపోతే వెళ్లడం అనవసరం అని వ్యాఖ్యానించాడు. మరోవైపు ఇటీవల శ్రీలంకలో పర్యటించిన ఆసీస్ జట్టు స్పిన్‌ను ఎదుర్కోలేకే 0-3 తేడాతో టెస్టు సిరీస్‌ను కోల్పోవడం గమనార్హం.