సొంత తమ్ముడి బౌలింగ్‌లో.. ఒకే ఓవర్లో ఆరు సిక్సులు బాదిన స్మిత్

తమ్ముడు తమ్ముడే.. పేకాట పేకాటే అనే సామెత మనకు తెలిసిందే. ఇదే మాటను వెస్టిండీస్ మాజీ క్రికెటర్ డ్వేన్ స్మిత్ నిజం చేశాడు. కాకపోతే.. తమ్ముడే తమ్ముడే క్రికెట్.. క్రికెటే అన్నట్టుగా.. ఆడాడు. బార్బడోస్‌లోని ఈడెన్ లాడ్జ్‌లో జరిగిన క్లబ్ మ్యాచ్‌లో సోదరుడు కేమర్ స్మిత్ బౌలింగ్‌లో ఒకే ఓవర్లో ఆరు సిక్సులు బాదాడు. 2015లో చివరిసారిగా అంతర్జాతీయ క్రికెట్ ఆడిన డ్వేన్.. ఇటీవలి కాలంలో పేరొందిన టీ20 లీగ్‌లు కూడా ఆడలేదు. కానీ తాజా క్లబ్ మ్యాచ్‌లో మాత్రం తొలి ఓవర్లోనే వరుసగా ఆరు సిక్సులు బాదడం గమనార్హం.

డ్వేన్ తమ్ముడైన కేమర్.. ఇప్పటి వరకూ బార్బడోస్ తరఫున ఒక్క ఫస్ట్ క్లాస్ మ్యాచ్ కూడా ఆడలేదు. కానీ ఈ ఆఫ్ స్పిన్నర్ ఇంగ్లాండ్‌లో ప్రొఫెషనల్ క్రికెట్ ఆడాడు. తమ్ముడి బౌలింగ్ వరుసగా ఆరు సిక్సులు బాదిన డ్వేన్.. అతడింకా మెరుగవ్వాల్సి ఉందని నిరూపించాడు.

తమ్ముడి బౌలింగ్‌ను ఊచకోత కోసిన స్మిత్.. మరో పది పరుగులు చేసిన తర్వాత ఔటయ్యాడు. ఆ తర్వాత కేమర్‌ బ్యాటింగ్‌కు దిగినప్పుడు అతణ్ని డ్వేన్ తొలి బంతికే గోల్డెన్ డక్‌గా పెవిలియన్ చేర్చాడు.