ఆస్ట్రేలియా లెక్కసరిచేసిన ఇంగ్లాండ్.. చేజేతులా ఓడిన కంగారూలు

ఇంగ్లాండ్, ఆస్ట్రేలియా మధ్య మాంచెస్టర్ వేదికగా జరుగుతున్న మూడు వన్డేల సిరీస్ ఆసక్తికరంగా మారింది. ఇటీవల ముగిసిన తొలి వన్డేలో 19 పరుగుల తేడాతో గెలుపొందిన ఆస్ట్రేలియా‌ని.. ఆదివారం రాత్రి జరిగిన రెండో వన్డేలో 24 పరుగుల తేడాతో ఓడించిన ఇంగ్లాండ్ గెలుపు లెక్కని సరిచేసింది. దాంతో.. సిరీస్ ప్రస్తుతం 1-1తో సమమవగా.. విజేత నిర్ణయాత్మక ఆఖరి వన్డే బుధవారం జరగనుంది.

మ్యాచ్‌లో టాస్ గెలిచి తొలుత బ్యాటింగ్ చేసిన ఇంగ్లాండ్ టీమ్‌లో ఎవరూ చెప్పుకోదగ్గ స్కోరు చేయలేకపోయారు. కెప్టెన్ ఇయాన్ మోర్గాన్ (42: 52 బంతుల్లో 5x4) టాప్ స్కోరర్‌గా నిలవగా.. ఆఖర్లో టామ్ కరన్ (37: 39 బంతుల్లో 5x4), ఆదిల్ రషీద్ (35: 26 బంతుల్లో 3x4, 1x6) దూకుడుగా ఆడారు. దాంతో.. ఇంగ్లాండ్ 9 వికెట్ల నష్టానికి 231 పరుగులు చేయగలిగింది. ఆస్ట్రేలియా బౌలర్లలో ఆడమ్ జంపా మూడు, మిచెల్ స్టార్క్ రెండు వికెట్లు పడగొట్టగా.. హేజిల్‌వుడ్, పాట్ కమిన్స్, మిచెల్ మార్ష్ తలో వికెట్ తీశారు.

232 పరుగుల లక్ష్య ఛేదనలో ఆస్ట్రేలియాకి కెప్టెన్ అరోన్ ఫించ్ (73: 105 బంతుల్లో 8x4, 1x6) మెరుగైన ఆరంభాన్నిచ్చాడు. అతనికి లబుషేన్ (48: 59 బంతుల్లో 3x4) కూడా తోడవడంతో ఆస్ట్రేలియా 30.4 ఓవర్లు ముగిసే సమయానికి 144/2తో తిరుగులేని స్థితిలో కనిపించింది. కానీ.. ఇదే స్కోరు వద్ద లబుషేన్ ఔటవగా.. ఆ తర్వాత 145 వద్ద మిచెల్ మార్ష్ (1), అరోన్ ఫించ్ ఓవర్ వ్యవధిలోనే పెవిలియన్ చేరిపోయారు. అనంతరం వచ్చిన మాక్స్‌వెల్ (1), పాట్ కమిన్స్ (11)తో పాటు మిచెల్ స్టార్క్ (0), ఆడమ్ జంపా (0).. ఆఖర్లో అలెక్స్ క్యారీ (36) కూడా ఔటవడంతో ఆస్ట్రేలియా 48.4 ఓవర్లలోనే 207 పరుగులకి ఆలౌటైపోయింది. ఇంగ్లాండ్ బౌలర్లలో క్రిస్‌వోక్స్, జోప్రా ఆర్చర్, శామ్ కరన్ మూడేసి వికెట్లు పడగొట్టగా.. ఆదిల్ రషీద్ ఒక వికెట్ తీశాడు.