వార్నర్-ఫించ్ దెబ్బ.. వన్డే క్రికెట్ చరిత్రలో భారత్ చెత్త రికార్డ్

వార్నర్-ఫించ్ దెబ్బకు భారత క్రికెట్ జట్టు వన్డే చరిత్రలోనే చెత్త రికార్డును మూటగట్టుకుంది. తొలి వన్డేలో మొదటి వికెట్‌కు 156 పరుగులు జోడించిన ఆసీస్ ఓపెనర్లు.. రెండో వన్డేలోనూ అదే తరహా ఆటతో 142 పరుగులు జోడించారు. మరోసారి షమీనే ఈ జోడీని విడగొట్టాడు. భారత జట్టు ఇప్పటి వరకూ 978 వన్డేలు ఆడగా.. వరుసగా మూడు మ్యాచ్‌ల్లో ప్రత్యర్థి జట్టు ఓపెనర్లు శతక భాగస్వామ్యం నమోదు చేయడం ఇదే తొలిసారి కావడం గమనార్హం. ఆస్ట్రేలియాతో వన్డే సిరీస్‌కు ముందు మార్టిన్ గుప్టిల్, నికోలస్ జోడీ.. మౌంట్ మౌంగనుయ్‌లో తొలి వికెట్‌కు 106 రన్స్ జోడించారు.

ఫించ్-వార్నర్ జోడికి వన్డేల్లో ఇది 12వ శతక భాగస్వామ్యం కాగా.. భారత్‌పై ఐదోది కావడం విశేషం. ఆస్ట్రేలియా తరఫున అత్యధిక శతక భాగస్వామ్యాలు నెలకొల్పిన ఓపెనింగ్ జంటగా గిల్‌క్రిస్ట్-హెడెన్ (16) తొలి స్థానంలో ఉండగా.. పాంటింగ్-క్లార్క్ (11)ను వార్నర్, ఫించ్ వెనక్కి నెట్టారు.

వన్డే చరిత్రలో అత్యధిక శతక భాగస్వామ్యాలు నెలకొల్పిన రికార్డ్ సచిన్-గంగూలీ జోడీ పేరిట ఉంది. వీరిద్దరూ 21సార్లు సెంచరీ పార్టనర్‌షిప్ నెలకొల్పారు. సచిన్-వీరూ సైతం 12సార్లు శతక భాగస్వామ్యాలు నెలకొల్పగా.. ఆ రికార్డును వార్నర్-ఫించ్ సమం చేశారు.