యువరాజ్ అవి మ్యాచవడం లేదు: ఇర్ఫాన్

భారత మాజీ క్రికెటర్లు యువరాజ్ సింగ్, ఇర్ఫాన్ పఠాన్ మైదానంలో ఎప్పుడు ఎదురుపడినా.. సరదాగా ఆట పట్టించుకుంటూ కనిపిస్తారు. గత ఏడాది అంతర్జాతీయ క్రికెట్‌కి యువరాజ్ సింగ్ రిటైర్మెంట్ ప్రకటించగా.. ఈ ఏడాది ఆరంభంలోనే ఇర్ఫాన్ పఠాన్ వీడ్కోలు పలికాడు. దీంతో.. ఇద్దరు క్రికెటర్లు మళ్లీ కలిసి ఆడే అవకాశం లేదు. దీంతో.. ప్రేమికుల రోజున యువీపై ఇర్ఫాన్ సరదాగా జోక్‌ పేల్చాడు.

ప్రేమికుల రోజు సందర్భంగా తన భార్య హేజిల్‌కీచ్‌తో కలిసి ఉన్న ఒక ఫొటోని సోషల్ మీడియా ద్వారా అభిమానులతో పంచుకున్న యువరాజ్ సింగ్.. నువ్వు పక్కన ఉంటే ప్రతిరోజూ ప్రేమికుల రోజే అని రాసుకొచ్చాడు. ఈ పోస్ట్‌కి ఇర్ఫాన్ పఠాన్ సరదాగా కామెంట్ పెట్టాడు. ‘యువరాజ్.. నీ ఎమోషనల్‌ విషెస్‌కి.. నీ మొహంలో కనిపిస్తున్న ఎక్స్‌ప్రెషన్స్ ఏమాత్రం మ్యాచ్ అవడం లేదు’ అని రాసుకొచ్చాడు. హేజిల్‌కీచ్‌తో సుదీర్ఘకాలం ప్రేమాయణం నడిపిన యువరాజ్ సింగ్.. 2016, నవంబరు 30న పెళ్లి చేసుకున్న విషయం తెలిసిందే.


2019 ఐపీఎల్ సీజన్‌లో ముంబయి ఇండియన్స్ టీమ్‌కి ఆడిన యువరాజ్ సింగ్ పేలవ ప్రదర్శనతో నిరాశపరిచాడు. దీంతో.. టీమిండియాలోకి రీఎంట్రీ ఇవ్వాలనే అతని ఆశలు అడియాశలయ్యాయి. ఆ తర్వాత గత ఏడాది వన్డే ప్రపంచకప్‌కి కూడా యువరాజ్ సింగ్‌ని సెలక్టర్లు పట్టించుకోకపోవడంతో.. నిరాశలో ఈ మాజీ ఆల్‌రౌండర్ రిటైర్మెంట్ ప్రకటించిన విషయం తెలిసిందే.