Dwayne Bravo: టీ20 వరల్డ్‌కప్‌లో ధోనీ ఆడతాడు.. నో డౌట్

భారత మాజీ కెప్టెన్ మహేంద్రసింగ్ ధోనీ వచ్చే ఏడాది జరగనున్న టీ20 ప్రపంచకప్‌లో తప్పకుండా ఆడతాడని వెస్టిండీస్‌ ఆల్‌రౌండర్ డ్వేన్ బ్రావో స్పష్టం చేశాడు. ఈ ఏడాది జులైలో వన్డే ప్రపంచకప్ ముగిసిన తర్వాత టీమిండియాకి దూరంగా ఉంటున్న ధోనీ.. కనీసం టీమ్ సెలక్షన్‌కి కూడా అందుబాటులో ఉండటం లేదు. దీంతో.. అతను రిటైర్మెంట్ ప్రకటించబోతున్నట్లు వార్తలు వస్తున్నాయి. కానీ.. ఆ వార్తలపై ధోనీ ఇప్పటి వరకూ పెదవి విప్పలేదు. మరోవైపు ధోనీ భవితవ్యంపై భారత సెలక్టర్లతో పాటు టీమిండియా మేనేజ్‌మెంట్‌ కూడా ఓ క్లారిటీకి రాలేకపోతోంది.


ధోనీ భవితవ్యంపై తాజాగా డ్వేన్ బ్రావో మాట్లాడుతూ ‘ధోనీ ఇప్పట్లో రిటైర్మెంట్ ప్రకటించడు. కాబట్టి.. వచ్చే ఏడాది ఆస్ట్రేలియా గడ్డపై జరగనున్న టీ20 ప్రపంచకప్‌లో అతను తప్పకుండా ఆడతాడు. ఇక విమర్శలు, రూమర్స్ అంటారా..? అవి ఎప్పుడూ ధోనీని ఏమాత్రం ప్రభావితం చేయలేవు. క్రికెట్‌ వెలుపలి అంశాలకి చింతిచొద్దు.. నీ సామర్థ్యాల్ని నమ్ముకో అని ధోనీ తరచూ టీమ్ సభ్యులతో చెప్తుంటాడు. తాను కూడా క్రికెటేతర అంశాల గురించి ఎప్పుడూ ఆలోచించడు’ అని డ్వేన్ బ్రావో వెల్లడించాడు. గత ఏడాది అంతర్జాతీయ క్రికెట్‌కి రిటైర్మెంట్ ప్రకటించిన డ్వేన్ బ్రావో మళ్లీ ఆ రిటైర్మెంట్ నిర్ణయాన్ని శుక్రవారం వెనక్కి తీసుకున్న విషయం తెలిసిందే. అయితే తాను అంతర్జాతీయ టీ20ల్లో మాత్రమే ఆడతానని బ్రావో వెల్లడించాడు.


ఐపీఎల్‌లో చెన్నై సూపర్ కింగ్స్‌కి ఆడుతున్న డ్వేన్ బ్రావోతో సుదీర్ఘకాలంగా ధోనీకి మంచి అనుబంధం ఉంది. వెస్టిండీస్‌ పర్యటనకి వెళ్లిన సమయంలో బ్రావో ఇంటికి ధోనీ ఫ్యామిలీతో కలిసి భోజనానికి వెళ్లాడు. అలానే ఐపీఎల్‌ సమయంలో వీరిద్దరూ మైదానంలో చాలా సరదాగా కనిపిస్తుంటారు. 2017లో చెన్నై సూపర్ కింగ్స్ టీమ్ నిషేధంలో ఉండగా.. డ్వేన్ బ్రావో (గుజరాత్ లయన్స్), ధోనీ (రైజింగ్ పుణె సూపర్ జెయింట్స్)‌ ప్రత్యర్థులుగా తలపడ్డారు. ఆ సమయంలో బ్రావో బౌలింగ్‌లో ధోనీ హిట్టింగ్ చేయగా.. అతను సరదాగా ధోనీని కవ్వించే ప్రయత్నం చేశాడు. అంతర్జాతీయ మ్యాచ్‌లు ఆడే సమయంలోనూ వీరిద్దరూ ఎదురుపడితే అక్కడ సరదాగా వాతావరణం నెలకొనేది.