టీమిండియాలో ఆ కల్చర్ ఏది..? యువీ ఫైర్

టీమిండియా క్రికెటర్లలో ప్రస్తుతం క్రమశిక్షణ లోపించిందని మాజీ ఆల్‌రౌండర్ యువరాజ్ సింగ్ అభిప్రాయపడ్డాడు. ఓపెనర్ రోహిత్ శర్మ‌తో ఇన్‌స్టాగ్రామ్ లైవ్ సెషన్‌లో మాట్లాడిన యువరాజ్ సింగ్.. గతంలో భారత్ సీనియర్ ఆటగాళ్లు టీమ్‌లోని జూనియర్స్‌కి చక్కగా దిశానిర్దేశం చేసేవాళ్లని గుర్తు చేసుకున్నాడు. కానీ.. ఇప్పుడు ఐపీఎల్, సోషల్ మీడియా కారణంగా రాత్రికి రాత్రే ఫేమ్ వస్తుండటంతో ఆటగాళ్లు కూడా క్రమశిక్షణ తప్పుతున్నారని యువరాజ్ వెల్లడించాడు. ఆ రోజుల్లో అయ్యుంటే కేఎల్ రాహుల్, హార్దిక్ పాండ్య.. మహిళలపై ఓ టాక్‌ షోలో అసభ్యంగా మాట్లాడే అవకాశం సీనియర్లు అస్సలు ఇచ్చి ఉండరు అని యువీ చెప్పుకొచ్చాడు.

Read More: కరోనా కట్టడికి సునీల్ గవాస్కర్ విరాళం

బాలీవుడ్ నిర్మాత కరణ్ జోహార్ హోస్ట్‌గా వ్యవహరిస్తున్న ‘‘కాఫీ విత్ కరణ్’ టాక్‌ షోకి 2018 డిసెంబరులో హాజరైన హార్దిక్ పాండ్య, కేఎల్ రాహుల్.. మహిళలపై అనుచిత వ్యాఖ్యలు చేసి కొన్ని రోజులు నిషేధానికి గురయ్యారు. పబ్‌లలో మహిళల్ని తాను చూసే విధానంపై హార్దిక్ నోరుజారగా.. అమ్మాయిలతో శారీరక సంబంధాల గురించి రాహుల్ అసభ్యకరంగా మాట్లాడాడు. దీంతో.. పెద్ద ఎత్తున విమర్శలు రావడం.. బీసీసీఐ కొద్దిరోజుల పాటు ఈ క్రికెటర్లపై నిషేధం వేయడం జరిగింది.

Read Also: ధోనీ: కెప్టెన్ కూల్‌కి కోపమెచ్చిన వేళ!

‘‘టీమిండియాలో అప్పట్లో ఓ మంచి సంస్కృతి ఉండేది. మీడియా ముందు ఎలా మాట్లాడాలి..? అభిమానులతో ఎలా వ్యవహరించాలి..? అనేదానిపై జూనియర్లకి సీనియర్ క్రికెటర్లు చక్కగా దిశానిర్దేశం చేసేవారు. ఒకవేళ ఏదైనా పొరపాటు జరిగితే..? అలా చేయకూడదంటూ సున్నితంగా హెచ్చరించేవారు. కానీ.. ఇప్పుడు భారత్ జట్టులో ఆ సంస్కృతి ఏమీ నాకు కనిపించడం లేదు. జూనియర్ క్రికెటర్లు సోషల్ మీడియా, పార్టీ కల్చర్ అంటూ రచ్చ చేస్తున్నారు. కానీ.. అప్పట్లో మేము వీటి గురించి కనీసం ఆలోచించను కూడా లేదు. ఏదైనా తప్పు చేస్తే.. సీనియర్లు కోప్పడతారనే భయం మాకు ఉండేది. రాహుల్- హార్దిక్ వివాదం మా టైమ్‌లో అయ్యుంటే అసలు జరిగేది కాదు’’ అని యువీ వెల్లడించాడు.