మాజీ క్రికెటర్ అజిత్ వాడేకర్ కన్నుమూత, ప్రధాని సంతాపం

భారత క్రికెట్ జట్టు మాజీ కెప్టెన్ అజిత్ వాడేకర్ (77) బుధవారం కన్నుమూశారు. గత కొంతకాలంగా అనారోగ్యంతో బాధపడుతున్న ఆయన ముంబయిలోని జన్‌లోక్ ఆసుపత్రిలో చికిత్స పొందుతూ మృతి చెందారు. వాడేకర్ ఇండియా తరఫున 37 టెస్ట్ మ్యాచ్‌లు, 2 వన్డే మ్యాచ్‌లు ఆడారు. భారత జట్టుకు మేనేజర్‌గా, కోచ్‌గానూ సేవలందించారు.

ఎడమ చేతివాటం బ్యాట్స్‌మన్‌గా భారత జట్టులో కీలక ఆటగాడిగా గుర్తింపుపొందారు. ఎనిమిదేళ్ల టెస్ట్‌ కెరీర్‌లో ఆయన 14 అర్ధ శతకాలు, ఒక శతకంతో మొత్తం 2113 పరుగులు చేశారు. 1967లో భారత ప్రభుత్వం అర్జున అవార్డు, 1972లో పద్మశ్రీతో గౌరవించింది. వాడేకర్‌ మృతిపై రాష్ట్రపతి రామ్‌నాథ్‌ కోవింద్‌తోపాటు ప్రధాని నరేంద్ర మోడీ, రాజకీయ, క్రీడా ప్రముఖులు విచారం వ్యక్తంచేశారు.