ధోనీని ఔట్ చేయడంపై గంగూలీ సలహాలు.. !

విజయ్ హజారే ట్రోఫీలో ఒంటిచేత్తో ఝార్ఖండ్‌కి వరుస విజయాలు అందిస్తున్న భారత మాజీ కెప్టెన్ మహేంద్ర సింగ్ ధోనీని ఎలా నియంత్రించాలో ప్రత్యర్థులకు పాలుపోవడం లేదు. దిల్లీ వేదికగా ఝార్ఖండ్‌తో శుక్రవారం బెంగాల్ జట్టు సెమీఫైనల్ మ్యాచ్‌తో అమితుమీకి సిద్ధమైంది. ఈ నేపథ్యంలో ధోనీని ఔట్ చేయడంపై బెంగాల్ క్రికెట్ అసోషియేషన్ అధ్యక్షుడు గంగూలీ బెంగాల్ జట్టుకు సలహాలిచ్చినట్లు సమాచారం. ఇప్పటికే బెంగాల్ కెప్టెన్ మనోజ్ తివారీ, కోచ్ సాయిరాజ్‌తో సమావేశమైన దాదా మ్యాచ్‌లో అనుసరించాల్సిన వ్యూహాల గురించి చర్చించి సూచనలిచ్చారంట.

మనోజ్ తివారీ మాట్లాడుతూ ‘మ్యాచ్‌లో మా వ్యూహాలను పక్కాగా అమలు చేసేందుకు ప్రయత్నిస్తాం. ఝార్ఖండ్ జట్టులో ధోనితో పాటు ప్రతిభ ఉన్న క్రికెటర్లు ఉన్నారు. సౌరభ్ తివారీ, ఇషాన్ కిషన్, విరాట్ సింగ్‌ మ్యాచ్ గమనాన్ని మార్చే శక్తి ఉన్నవాళ్లే. అందుకే మేము ఏ ఒక్కరిపై కాకుండా... అందరిపైనా దృష్టి కేంద్రీకరించి పక్కాగా ప్రణాళికలు రూపొందించాం’ అని ధీమా వ్యక్తం చేశాడు. ఝార్ఖండ్ జట్టుకు ధోనీ పెద్ద బలం.. కానీ మా జట్టులోని యువ ఆటగాళ్లు కూడా తప్పిదాల నుంచి పాఠాలు నేర్చుకుని సత్తా నిరూపించుకునేందుకు ఉవ్విళ్లూరుతున్నారని మనోజ్ వివరించాడు.