ధోనీకి మద్దతుగా నిలిచిన గంభీర్..!

న్యూజిలాండ్‌తో సిరీస్‌లో విఫలమైన భారత మాజీ కెప్టెన్ మహేంద్రసింగ్ ధోనీకి .. వెటరన్ ఓపెనర్ గౌతమ్ గంభీర్ మద్దతుగా నిలిచాడు. మైదానంలో, వెలుపల ధోనీ చాలా సరదాగా ఉంటాడని.. అతని కెప్టెన్సీలో తాను బాగా ఎంజాయ్ చేసినట్లు గంభీర్ చెప్పుకొచ్చాడు. గత కొన్నేళ్లుగా ధోనీ, గంభీర్ మధ్య మనస్పర్థలు ఉన్నట్లు వార్తలు వస్తున్నాయి. వాటికి బలం చేకూరుస్తూ.. గత ఏడాది ఐపీఎల్ సమయంలో ధోనీ బ్యాటింగ్ చేస్తుండగా.. అతనికి టెస్టు తరహా ఫీల్డింగ్‌ని గంభీర్ సెట్ చేశాడు. తాజాగా కివీస్‌‌తో ముగిసిన రెండో టీ20లో ధోనీ పేలవ బ్యాటింగ్ కారణంగానే భారత్ ఓడిపోయిందని.. అతని స్థానంలో యువ క్రికెటర్లకి అవకాశం ఇవ్వాలంటూ మాజీ క్రికెటర్లు వీవీఎస్ లక్ష్మణ్, అగార్కర్ గళం విప్పుతున్న విషయం తెలిసిందే.

‘సౌరవ్ గంగూలీ, రాహుల్ ద్రవిడ్, వీరేంద్ర సెహ్వాగ్, మహేంద్రసింగ్ ధోనీ కెప్టెన్సీలో నేను ఆడాను. అయితే.. ధోనీ నాయకత్వంలోనే నేను ఎక్కువగా ఆటని ఆస్వాదించగలిగాను. మా ఇద్దరి మధ్య చాలా సరదా వాతావరణం ఉండేది. అతని వ్యూహాలన్నీ చాలా సింపుల్‌గా ఉండేవి. కానీ.. వాటి ఫలితాలు మాత్రం ఎవరి ఊహకి అందేవి కావు. అప్పట్లో ధోనీ కెప్టెన్సీని అందరూ విమర్శించారు. కానీ.. సంధి దశలో అతను భారత్ జట్టు పునరుద్ధరణ కోసం చాలా కష్టపడ్డాడు. పరాజయాలు ఎదరైనా.. తన భావోద్వేగాలను అదుపులోకి ఉంచుకుని జట్టుని ముందుకు నడిపించాడు. ప్రస్తుతం జట్టు విజయాలే దానికి నిదర్శనం. ఇంతచేసినా.. ధోనీని పదే పదే ఎందుకు విమర్శిస్తున్నారో అర్థం కావడం లేదు’ అని గంభీర్ వివరించాడు.