Ranji Trophy: కెరీర్ ‘ఆఖరి’ మ్యాచ్‌లో గౌతమ్ గంభీర్ శతకం..!

భారత వెటరన్ ఓపెనర్ గౌతమ్ గంభీర్ కెరీర్ ఆఖరి మ్యాచ్‌లోనూ శతకంతో చెలరేగాడు. నాలుగు రోజుల క్రితం క్రికెట్‌లోని అన్ని ఫార్మాట్లకి అనూహ్యంగా రిటైర్మెంట్ ప్రకటించిన గౌతమ్ గంభీర్.. ఆంధ్రాతో తాజాగా జరుగుతున్న రంజీ మ్యాచ్‌లో 185 బంతులాడి 10 ఫోర్లు సాయంతో 112 పరుగులు చేశాడు.

ఢిల్లీలోని ఫిరోజ్ షా కోట్ల వేదికగా జరుగుతున్న ఈ మ్యాచ్‌లో మూడో రోజైన శనివారం ఓవర్‌ నైట్ వ్యక్తిగత స్కోరు 92తో ఇన్నింగ్స్‌ని కొనసాగించిన గంభీర్.. అలవోకగా శతకాన్ని పూర్తి చేసుకున్నాడు. ఫస్ట్‌క్లాస్ కెరీర్‌లో ఈ వెటరన్ ఓపెనర్‌కి ఇది 42వ శతకంకాగా అతని జోరుతో ఢిల్లీ జట్టు తొలి ఇన్నింగ్స్‌లో 68 ఓవర్లు ముగిసే సమయానికి 221/2తో నిలిచింది.

ఈ మ్యాచ్‌లో తొలుత బ్యాటింగ్ చేసిన ఆంధ్రా జట్టు మొదటి ఇన్నింగ్స్‌లో 390 పరుగులకి ఆలౌటైంది. రికీ భుయ్ (187: 270 బంతుల్లో 26x4, 1x6) అసాధారణ ఆటతీరుతో ఢిల్లీ బౌలర్లని ఉతికారేశాడు. ఆటలో మరో రెండు రోజులు మాత్రమే మిగిలి ఉండటంతో.. మ్యాచ్ డ్రా అయ్యే అవకాశాలు ఎక్కువగా ఉన్నాయి.