చాపెల్‌ది చేతకాని తనం.. జట్టును ముక్కలు చేశాడు: వీవీఎస్ లక్ష్మణ్

ఆస్ట్రేలియా మాజీ క్రికెటర్ గ్రెగ్ చాపెల్ టీమిండియా కోచ్‌గా ఉన్నప్పుడు ఎన్ని వివాదాలకు కారణమయ్యారో అందరికీ తెలిసిందే. చాపెల్ ప్రవర్తనతో విసిగిపోయిన గంగూలీ, సచిన్ వంటి సీనియర్ క్రికెటర్లు బహిరంగంగానే ఆయనపై ఉన్న అసహనాన్ని బయటపెట్టారు. తాజాగా మరో మాజీ క్రికెటర్ వీవీఎస్ లక్ష్మణ్ కూడా చాపెల్‌పై కీలక వ్యాఖ్యలు చేశారు. కోచ్‌గా గ్రెగ్ చాపెల్ ప్రవర్తన చాలా కఠినంగా ఉండేదని, ఒక అంతర్జాతీయ జట్టును ఎలా నడిపించాలో చాపెల్‌కు చేతకాదని లక్ష్మణ్ తన పుస్తకంలో పేర్కొన్నారు.

‘281 అండ్ బియాండ్’ పేరిట తన ఆత్మకథను ఇటీవల లక్ష్మణ్ విడుదల చేశారు. ఈ పుస్తకంలో టీమిండియా మాజీ కోచ్ గ్రెగ్ చాపెల్ గురించి ప్రస్తావించారు. ఈ ఆస్ట్రేలియన్ కోచ్ కారణంగా జట్టు రెండు, మూడు భాగాలుగా విడిపోయిందని.. జట్టులో తీవ్ర అంసతృప్తి నెలకొందని లక్ష్మణ్ పేర్కొన్నారు. ‘ఆ కోచ్‌కి జట్టులో ఇష్టమైన ఆటగాళ్లు ఉండేవారు. వాళ్లనే పట్టించుకునేవాడు. వాళ్లు తరవాత జట్టులో నిలదొక్కుకున్నారు. కానీ ఇతర ఆటగాళ్లు వాళ్ల బాధలు వారు పడుతూ కనుమరుగైపోయారు. మా కళ్లముందే జట్టు పతనమైపపోయింది’ అని లక్ష్మణ్ పేర్కొన్నారు.

గ్రెగ్ చాపెల్ పదవీకాలం మొత్తం ఒక చేదు జ్ఞాపకమని లక్ష్మణ్ అభివర్ణించారు. ‘అతని ప్రవర్తన చాలా కఠినంగా, మూర్ఖంగా ఉండేది. ఒక అంతర్జాతీయ జట్టును ఎలా నడిపించాలో అతనికి తెలీదు. క్రికెట్ ఆడే ఆటగాళ్లే స్టార్లు అవుతారు, కోచ్ కాదు అనే విషయాన్ని కూడా ఆయన మరిచిపోయినట్టున్నాడు’ అని ఘాటుగా లక్ష్మణ్ పేర్కొన్నారు. క్రికెట్ రైటర్ ఆర్.కౌశిక్‌తో కలిసి లక్ష్మణ్ ఈ పుస్తకం రాశారు.