3rd T20లో రోహిత్ మెరుపులు.. కివీస్ టార్గెట్ 180

న్యూజిలాండ్ గడ్డపై భారత ఓపెనర్ రోహిత్ శర్మ బ్యాట్ ఝళిపించాడు. తొలి రెండు టీ20ల్లోనూ తేలిపోయిన రోహిత్ శర్మ (65: 40 బంతుల్లో 6x4, 3x6) హామిల్టన్ వేదికగా బుధవారం జరిగిన మూడో టీ20 మ్యాచ్‌లో హాఫ్ సెంచరీ బాదడంతో టాస్ ఓడి మొదట బ్యాటింగ్ చేసిన భారత్ జట్టు 5 వికెట్ల నష్టానికి 179 పరుగులు చేయగలిగింది. ఐదు టీ20ల ఈ సిరీస్‌లో తొలి రెండు మ్యాచ్‌ల్లోనూ ఛేదనకు దిగిన భారత్ జట్టు గెలుపొందిన విషయం తెలిసిందే.

Read Also: undefined


మ్యాచ్‌లో టాస్ గెలిచిన న్యూజిలాండ్ కెప్టెన్ కేన్ విలియమ్సన్ ఫీల్డింగ్ ఎంచుకున్నాడు. దీంతో.. కేఎల్ రాహుల్ (27: 19 బంతుల్లో 2x4, 1x6)తో కలిసి భారత్ ఇన్నింగ్స్‌ని ప్రారంభించిన రోహిత్ శర్మ ఆరంభం నుంచే ఎడాపెడా బౌండరీలు బాదేశాడు. తొలి రెండు టీ20ల్లోనూ హాఫ్ సెంచరీలు బాదిన రాహుల్ ఆచితూచి ఆడినా.. రోహిత్ మాత్రం టాప్‌గేర్‌లో కొనసాగాడు. ఈ క్రమంలో హాఫ్ సెంచరీ బాదిన రోహిత్ శర్మ 11వ ఓవర్‌లో ఔటవగా.. ఆ తర్వాత స్కోరు బోర్డు కాస్త నెమ్మదించింది.

Read Also: కోహ్లీ, రాహుల్.. నా షాట్‌నే కాపీ కొడతారా? ఫర్వాలేదు.. యువకుల్లారా కానివ్వండి!


రోహిత్ శర్మ ఔట్ తర్వాత క్రీజులోకి వచ్చిన శివమ్ దూబే (3) తేలిపోగా.. కెప్టెన్ విరాట్ కోహ్లీ (38: 27 బంతుల్లో 2x4, 1x6), శ్రేయాస్ అయ్యర్ (17: 16 బంతుల్లో 1x6) దూకుడుగా ఆడలేకపోయారు. కానీ.. చివరి ఓవర్‌లో మనీశ్ పాండే (14 నాటౌట్: 6 బంతుల్లో 1x4, 1x6), రవీంద్ర జడేజా (10 నాటౌట్: 5 బంతుల్లో 1x6) చెరొక సిక్స్ బాది 18 పరుగులు రాబట్టడంతో భారత్ జట్టు 179 పరుగుల మెరుగైన స్కోరు చేయగలిగింది. న్యూజిలాండ్ బౌలర్లలో బెనెట్ మూడు, శాంట్నర్, గ్రాండ్‌హోమ్ చెరొక వికెట్ పడగొట్టారు.