ఫైనల్లో రనౌట్‌పై స్పందించిన హార్దిక్ పాండ్య

ఛాంపియన్స్ ట్రోఫీ ఫైనల్లో పాకిస్థాన్‌పై భీకర హిట్టింగ్‌తో అందర్నీ ఆశ్చర్యపరిచిన హార్దిక్ పాండ్య రనౌట్ విషాధం అందరికీ గుర్తుండే ఉంటుంది. పరుగు కోసం పిలిచిన జడేజా.. తిరిగి వెనక్కి వెళ్లిపోవడంతో ఈ యువ హిట్టర్ రనౌట్‌గా వెనుదిరగాల్సి వచ్చింది. జడేజా అలా చేయడంతో తీవ్ర అసహనం వ్యక్తం చేసిన హార్దిక్ పాండ్య.. బిగ్గరగా అరుస్తూ కోపంగా పెవిలియన్‌ బాట పట్టాడు. దీంతో మ్యాచ్ అనంతరం డ్రెస్సింగ్‌ రూములో వీరిద్దరి మధ్య పెద్ద గొడవ జరిగి ఉంటుందని అంతా భావించారు. జూన్ 18న ఫైనల్ జరగగా.. ప్రస్తుతం వెస్టిండీస్ పర్యటనలో ఉన్న హార్దిక్ పాండ్య తాజాగా ఆ రనౌట్‌పై స్పందించాడు.

‘ఆ రనౌట్ అసహనం నుంచి బయటపడటానికి కొంత సమయం పట్టింది. వాస్తవంగా చెప్పాలంటే మూడు నిమిషాల పాటు పట్టరాని కోపంతో ఊగిపోయాను. కానీ.. ఆ తర్వాత కొద్దిసేపటికే రనౌట్ తీరు గుర్తు చేసుకుని నవ్వు ఆపుకోలేకపోయాను. నన్ను చూసి డ్రెస్సింగ్ రూములోని క్రికెటర్లూ నవ్వేశారు’ అని హార్దిక్ పాండ్య వివరించాడు. ఈ రనౌట్‌ అనంతరం రవీంద్ర జడేజాని విలన్‌గా చిత్రీకరిస్తూ సోషల్ మీడియాలో రెచ్చిపోయిన అభిమానులు.. పాక్‌పై హార్దిక్ హిట్టింగ్‌ని తెగపొగిడేశారు.