హార్దిక్ ఎవరితోనూ మాట్లాడటం లేదు..!: హిమాన్షు

మహిళలపై అనుచిత వ్యాఖ్యలు చేసి సస్పెన్షన్‌కి గురైన భారత యువ ఆల్‌రౌండర్ హార్దిక్ పాండ్య.. కనీసం ఇంటి నుంచి వెలుపలకి కూడా రావడం లేదని అతని తండ్రి హిమాన్షు పాండ్య వెల్లడించాడు. ఇటీవల కేఎల్ రాహుల్‌తో కలిసి ‘కాఫీ విత్ కరణ్’ టాక్ షోకి హాజరైన హార్దిక్ పాండ్య.. అమ్మాయిలతో డేటింగ్, పార్టీల్లో వారిని చూసే విధానంపై అభ్యంతరకంగా మాట్లాడాడు. దీంతో.. క్రమశిక్షణ చర్యలు తీసుకున్న బీసీసీఐ.. వారిని తాత్కాలికంగా సస్పెండ్ చేసింది. ఆ సమయంలో.. ఆస్ట్రేలియాతో వన్డే సిరీస్‌కి సిద్ధమవుతున్న ఇద్దరు క్రికెటర్లు.. తమపై వేటు పడటంతో వెంటనే భారత్‌కి వచ్చేశారు. ఆస్ట్రేలియా నుంచి వచ్చిన హార్దిక్ పాండ్య.. ఇప్పుడు ఎవరితోనూ మాట్లాడటం లేదని.. ఎక్కడికీ వెళ్లకుండా ఇంట్లోనే ఉంటున్నాడని అతని తండ్రి చెప్పుకొచ్చాడు.

‘భారత్, ఆస్ట్రేలియా మధ్య జరుగుతున్న వన్డే మ్యాచ్‌లను హార్దిక్ పాండ్య వీక్షిస్తున్నాడు. అక్కడ నుంచి వచ్చిన తర్వాత అతను కనీసం ఇంటి వెలుపలకి కూడా వెళ్లలేదు. ఎవరితోనూ ఫోన్లలో మాట్లాడటం లేదు. గుజరాత్‌లో పెద్ద ఎత్తున సంక్రాంతి సంబరాలు జరుగుతున్నా.. అతను తనకెంతో ఇష్టమైన గాలిపటాలని ఎగురవేసేందుకు కూడా ఇష్టపడలేదు. గత మూడేళ్లుగా క్రికెట్‌ కారణంగా అతనికి ఇంటి దగ్గర పండుగ జరుపుకునే అవకాశం దక్కలేదు. తాజాగా ఆ ఛాన్స్ లభించినా.. సంబరాలు చేసుకునే మూడ్‌లో అతను లేడు’ అని హిమాన్షు వెల్లడించాడు.