మానవత్వాన్ని చాటుకున్న హార్దిక్ పాండ్య..!

ఇంగ్లాండ్ గడ్డపై తొలి టెస్టులో భారత ఆల్‌రౌండర్ హార్దిక్ పాండ్య విఫలమైనా.. మానవత్వంతో అందరి మనసులు గెలుచుకున్నాడు. బర్మింగ్‌హామ్ వేదికగా గత శనివారం ముగిసిన తొలి టెస్టు మ్యాచ్‌లో భారత్ జట్టు 31 పరుగుల తేడాతో పరాజయాన్ని చవిచూసిన విషయం తెలిసిందే. ఈ మ్యాచ్‌ ముగిసిన తర్వాత ఇషాంత్ శర్మ, కేఎల్ రాహుల్‌తో కలిసి హోటల్‌కి వెళ్లిన హార్దిక్ పాండ్య తనతో పాటు ఓ కవర్‌ని లోపలికి తీసుకెళ్లాడు. మిగిలిన ఇద్దరు క్రికెటర్లు వేగంగా తమ గదికి వెళ్లిపోగా.. హార్దిక్ పాండ్య మాత్రం ఆ కవర్‌ని నేరుగా తీసుకెళ్లి హోటల్ సిబ్బందికి అందజేశాడు.

‘ఈ కవర్‌లో ఒకరికి సరిపడ భోజనం ఉంది. మేము డిన్నర్ చేసేటప్పుడు ఈ కవర్‌‌ని అస్సలు తాకలేదు. ఎవరైనా.. ఆకలితో భోజనం కోసం మీ హోటల్‌ దగ్గరికి వస్తే ఈ కవర్‌ని అందజేయండి’ అని సిబ్బందికి సూచించాడు. ఇంగ్లాండ్‌లో రాత్రి పూట భోజనం కోసం హోటల్‌ దగ్గరికి వ్యక్తులు రావడాన్ని గమనించే హార్దిక్ అలా కవర్‌ని సిబ్బందికి ఇచ్చినట్లు తెలుస్తోంది. ఈ విషయం తాజాగా వెలుగులోకి రావడంతో.. ఈ ఆల్‌రౌండర్‌ గొప్ప మనసుని అందరూ ప్రశంసిస్తున్నారు. రెండో టెస్టు మ్యాచ్ గురువారం నుంచి లార్డ్స్ వేదికగా జరగనుంది.