కోహ్లి నెం.1 రికార్డు‌ని చెరిపేసిన ఆమ్లా..!

భారత కెప్టెన్ విరాట్ కోహ్లి వేగవంతమైన 7వేల పరుగుల రికార్డును దక్షిణాఫ్రికా ఓపెనర్ హసీమ్ ఆమ్లా సోమవారం చెరిపేశాడు. ఇంగ్లాండ్‌తో జరిగిన మూడో వన్డే మ్యాచ్‌లో ఆమ్లా (55: 54 బంతుల్లో 11x4) అర్ధశతకం బాది వన్డేల్లో వేగంగా 7వేల పరుగుల మైలురాయిని అందుకున్న క్రికెటర్‌గా నిలిచాడు. విరాట్ కోహ్లి ఈ రికార్డును 161 ఇన్నింగ్స్‌ల్లో అందుకోగా.. ఆమ్లా 150వ ఇన్నింగ్స్‌లో చేరుకోవడం విశేషం.

ఫార్మాట్ ఏదైనా.. వేగంతో పాటు నిలకడగా పరుగులు రాబట్టడం ఆమ్లా స్టైల్. అందుకే ఈ ఓపెనర్‌ని దక్షిణాఫ్రికా పరుగుల యంత్రం అని అభిమానులు ముద్దుగా పిలుచుకుంటారు. ఇప్పటి వరకు కెరీర్‌లో 153 వన్డేలాడిన ఆమ్లా.. 24 శతకాలు, 32 అర్ధశతకాలు చేశాడు. అతని సగటు 50.19కాగా.. స్ట్రైక్ రేట్ 89.15 ఉండటం కొసమెరుపు.

వన్డేల్లో వేగంగా 7 వేల పరుగుల మైలురాయిని అందుకున్న క్రికెటర్ల టాప్ -5 జాబితాను ఓ సారి పరిశీలిస్తే.. ఆమ్లా (150వ ఇన్నింగ్స్), విరాట్ కోహ్లి (161), డివిలియర్స్ (166), గంగూలీ (174), బ్రియాన్ లారా (183).