మ్యాచ్‌కే హైలెట్.. ఆమ్లా రనౌట్, శభాష్ పాండ్య!

ఐదో వన్డేలో క్రీజులో పాతుకుపోయిన ఆమ్లా.. దక్షిణాఫ్రికాను విజయపథంలో నడిపిస్తోన్న వేళ హార్దిక్ పాండ్య అద్భుతం చేశాడు. డైరెక్ట్ త్రో విసిరి ఆమ్లాను రనౌట్ చేశాడు. పాండ్య విసిరిన బంతి వికెట్లకు తాకి బెయిల్స్ ఎగిరి లైట్లు వెలిగిన మిల్లీ సెకన్ల వ్యవధిలోనే ఆమ్లా బ్యాట్‌ను క్రీజులో ఉంచాడు. అదృష్టం ఈసారి భారత్‌ను వరించడంతో.. బెయిల్స్ గాల్లోకి లేచే సమయానికి బ్యాట్ అంచు మాత్రమే క్రీజు గీతపై ఉంది. దీంతో థర్డ్ అంపైర్ అవుట్‌గా ప్రకటించాడు.

అంతకు ముందు రహానే క్యాచ్ జారవిడచడం, అంపైర్ తప్పిదం కారణంగా రెండుసార్లు జీవదానం పొందిన ఆమ్లా 71 పరుగుల వద్ద రనౌటై నిరాశగా పెవిలియన్ చేరాడు. హార్దిక్ పాండ్య విసిరిన డైరెక్ట్ త్రోను సఫారీ ఆటగాళ్లు నమ్మలేకపోగా.. కోహ్లిసేన సంబరాల్లో మునిగిపోయింది. మరుసటి ఓవర్లో కుల్దీప్ పెహ్లుక్వాయోను పెవిలియన్ చేర్చడంతో భారత్ మ్యాచ్‌పై పట్టు బిగించింది.