నేనే రెస్ట్ కావాలన్నాను: హార్దిక్ పాండ్యా

గత కొద్దికాలంగా నిలకడగా రాణిస్తున్న ఆల్‌రౌండర్ హార్దిక్ పాండ్యాను శ్రీలంకతో తొలి రెండు టెస్టులకు పక్కన పెట్టడంతో అందరూ ఆశ్చర్యానికి గురయ్యారు. ఇంతకీ పాండ్యాను ఎందుకు పక్కన పెట్టినట్లు తెగ చర్చించుకున్నారు. అయితే తన కోరిక మేరకే సెలెక్టర్లు శ్రీలంకతో టెస్టులకు ఎంపిక చేయలేదని హార్దిక్ పాండ్యా సెలవిచ్చాడు. పూర్తి ఫిట్‌నెస్‌తో లేనని భావించి, తానే సెలక్టర్లను విశ్రాంతి కోరానని సోమవారం చెప్పాడు. వాస్తవానికి తొలుత పాండ్యా శ్రీలంకతో ఆడే భారత జట్టులో ఉన్నాడు. కానీ బీసీసీఐ మీడియాకు వెళ్లడించిన జట్టులో మాత్రం పాండ్యా పేరు లేదు. అసలు పాండ్యాకు గాయమైందా.. లేక వేరే కారణంతో ఏమైనా పక్కన పెట్టారా.. అనే విషయాలు బీసీసీఐ చెప్పలేదు. దీంతో ఇప్పుడు పాండ్యా క్లారిటీ ఇచ్చాడు.

‘నిజాయితీగా చెప్పాలంటే, నేనే సెలక్టర్లను అడిగా. నా శరీరం పూర్తి సిద్ధంగా లేదు. తీరికలేకుండా క్రికెట్‌ ఆడడంతో చిన్న చిన్న గాయాలతో ఇబ్బందిపడుతున్నా. పూర్తిగా ఫిట్‌గా ఉన్నానని, 100 శాతం ఆటను ప్రదర్శించగలనని భావించినప్పుడే క్రికెట్‌ ఆడతా’ అని పాండ్యా చెప్పుకొచ్చాడు. ఈ విరామం దొరకడం తనకు అదృష్టమని, ఈ విరామంలో తన ఫిట్‌నెస్‌ను మెరుగుపర్చుకుంటానని, జిమ్‌లో శిక్షణ పొందుతానని వెల్లడించాడు. దక్షిణాఫ్రికాతో సిరీస్‌ కోసం ఆసక్తిగా ఎదురుచూస్తున్నట్లు పాండ్యా తెలిపాడు. ‘దక్షిణాఫ్రికాతో సిరీస్ అంటే భారీ అంచనాలు ఉంటాయి. జీవితంలో సవాళ్లను ఎదుర్కోవడమంటే నాకిష్టం. అవి నన్ను ముందుకు నడిపిస్తాయి. దక్షిణాఫ్రికాలో మేం బాగా ఆడగలమనే నమ్మకం నాకుంది’ అని పాండ్యా స్పష్టం చేశాడు.