విరాట్ కోహ్లీ ఎంపిక కోసం పోరాడా: అతుల్

రంజీల్లో ఢిల్లీ జట్టు‌కి విరాట్ కోహ్లీని ఎంపిక చేసేందుకు అప్పట్లో తాను చాలా పోరాడాల్సి వచ్చిందని మాజీ ఫాస్ట్‌ బౌలర్, ఢిల్లీ సెలక్షన్‌ కమిటీ ఛైర్మన్ అతుల్ వాసన్ వెల్లడించాడు. 2006 నవంబరులో ఢిల్లీ తరఫున అరంగేట్రం చేసిన విరాట్ కోహ్లీ ఆ మ్యాచ్‌లో 10 పరుగులకే ఔటైపోయాడు. అతనితో పాటు అదే మ్యాచ్‌లో అరంగేట్రం చేసిన ఇషాంత్ శర్మ మాత్రం నాలుగు వికెట్లతో మెరిశాడు. కానీ.. ఆ తర్వాత అండర్-19 ప్రపంచకప్‌లో భారత్ జట్టుని విజేతగా నిలిపిన కోహ్లీ.. అనతికాలంలో టీమిండియాలోకి అడుగుపెట్టాడు.

‘ఢిల్లీ మేనేజ్‌మెంట్ అప్పట్లో విరాట్ కోహ్లీ, ఇషాంత్ శర్మని జట్టులోకి తీసుకునేందుకు ఇష్టపడలేదు. ఎందుకంటే.. అప్పట్లో వారు అండర్-19‌కి ఆడేవారు. కానీ.. వారిద్దరూ ఢిల్లీ జట్టుకి రంజీల్లో ఆడాలని నేను పట్టుబట్టి.. పోరాడి ఎంపిక చేశాను. ఆ తర్వాత వారు ఏ స్థాయికి చేరుకున్నారో మీరే చూస్తున్నారు. 11 ఏళ్ల వయసులోనే విరాట్ కోహ్లీ నా అకాడమీకి వచ్చాడు. అప్పటి నుంచి అతని ఆటని నేను గమనిస్తూ వచ్చాను’ అని అతుల్ వాసన్ వెల్లడించాడు.